Viser innlegg med etiketten Plastfritthav. Vis alle innlegg
Viser innlegg med etiketten Plastfritthav. Vis alle innlegg

fredag 26. april 2019

Kortreist påskepadling

22.04 Påska og våren er ofte den aller finaste tida på Vestlandet. I år slo det til for fullt, og vi fekk full sommar og t-skjortever på toppen! Mange i padlegjengen hadde heimepåske, så det vart turar både i aust og vest, og sosiale kjekke dagar. Finalen tok vi likegodt i skjergarden mellom Giske og Haram, som er eit utruleg flott område med holmar og skjer og nokre større øyer.

Fin gjeng på sjøen, frå "downtown" Valderøya

Kjeholmen

Vraksafari - slik gjorde dei det før i tida..

Fleire i gruppa hadde barndommsminne og masse lokalkunnskap frå området, så det vart mange gode historier langs med utover dagen. 

"Kongen" helsar på - og flaug rett over hovuda på oss

Snirkling og korte kryssingar i vindstille og sol! 

 
Lekkert I! 

Lekkert II

Silkeføre. Passe fort, passe langt. 

Fløyelsfjord

Grønneguiden og damene

Kalvøyholmen vest - flott plass for strandhogg i dag! (Og eg hadde ein bitteliten baktanke her..)

Grilling og skrøner frå Nord-Norge. No har vi lært kva som er problemet om bålrøyken følgjer oss...

Det var nesten for varmt i sola, og deileg å slappe av. Vi hadde med hanskar og ryddesekkar, men det var nesten feil å dra i gang rydding på ein slik sommardag. Etter litt nøling tok vi det fram og vipps var heile gjengen i gang!

Rydding pågår! Foto: Jan Roger

Holme er pepra med isopor, og sjølv om Mildrid og eg rydda her i oktober så var det dessverre lett å finne mengder. 

9 stk - ein time rydding. Då hadde vi dekt eit par hundre meter strandlinje og pakka saman 9 sekkar + diverse kanner og store isoporbitar. 

I terrenget - overalt. Det er nesten umolgeg å plukke opp. 
Eg trur eg skal gå til "krig" mot dårleg avfallshandtering av ispor. 

Det var ein slik dag som kunne vart evig, og ingen ville eigentleg heim. Eg synes det var utruleg kjekt at vi fann roen i mange timar på holmen. 

Det er fine folk eg padlar med, men merkeleg nok er dei meir interessert i å rydde plast enn å bade. Så badinga måtte eg ta ansvar for aleine, under lett press frå Ingvild og Roger. Ikkje avskrekkande kaldt, men førebels nok med einsifra tal svømmetak. 

Aprilbad: Foto Ingvild
  
Etter at vi har vore her: det ser bra ut! 
Vi har etterkvart fått taket på sporlaus ferdsel! 
Rettare sagt: Det var ein stor skilnad: langt meir plast og rusk i området då vi kom enn då vi for. 

På heimvegen traff vi eit flytande kar frå Hofseth biocare. 
Vi har sendt beskjed til dei, no er eg spent på om dei hentar avfallet sitt. Ei bedrift som heiter "biocare" KAN rett og slett ikkje strø om seg med plastavfall i sjøen. 

Glitrehav, medsjø og medvind. Heimvegen gjekk som ein leik!

Snirkling - Tommy!

Samling før kryssing av skipsleia. 

Vi klarte det nesten. Å padle å samla over. 

Der det kan padlast gjennom osv osv...

Teambilde!! Foto: Tommy

Takk for ein fantastisk dag! 
Påskepadling med plastrydding og pølsegrilling var ein perfekt finale på århundrets til no finaste påske i vest! 
14 kilometer. 

torsdag 7. mars 2019

Strandrydding på Synes mars 2019

3. mars Ny vår - nytt søppel! Padlemiljøet i Giske starta systematisk rydding i fjor. Vi vil halde fram og rydde det same området. Synesholmen er litt kronglete for andre å komme seg ut til - men perfekt for oss med kajakk. Heile vågen og holmen er naturreservat og Ramsarområde - det vil seie internasjonalt viktig våtmarksområde. Tilfeldigvis traff vi også på FN sin World wildlife day. Fugle- og dyrelivet er ein viktig motivasjonsfaktor for oss, så det passa bra!

Padleryddegjengen

Synesvågen mot holmen. Naturreservat. 

Vi var litt bekymra for å ha for lita tid, så nokre av oss tjuvstarta i vågen på laurdag. 

Stranda var overraskande rein. 

Dagens dunge på ca 1 km strandlinje


Kobbene låg på skjera og held auge med oss. Dei verka å vere godt nøgde med innsatsen.

Søndagen slo til med vindstille og perfekte forhold!

Ut mot Synesholmen, ca 1 km padling

Fin landing, heldige med floa

Ein holme i havet..

Vi sette i gong og fordelte oss utover. Det såg betre ut enn i fjor. Ein god miks av kjensler breia seg: det å gjere ein skilnad for miljøet, opplevinga av å rusle langt ute mot havet ein vakker vårdag, endeleg kjenne energien frå sola og det sosiale saman med trivelege padlevenner. Og litt skattejakt.

Tau i alle storleikar

Torunn med den finaste skatten! Ei flott glaskule. Den trur eg vart med heim og ikkje i HoldNorge reint -sekken. 

Sjølv om huvudinntrykket var bra var det litt å finne

Eg fant, eg fant!! 
Denne vart donert til Kajakkguiden så han kan bruke den i kurs og trening

Med ni personar og relativ lite plast gjekk det på eit blunk å gå over holmen. Eller kanskje 1,5 time? 

Rein holme, depo med 10 sekkar for henting samt litt tau, blåser og brøytestikker utanom. 

Det nyttar å rydde! Utruleg motiverande å finne så mykje mindre i år! 

Kunst

Lunsj




Førstegangspadlar i godt driv inn att! 

For effektive ryddarar opnar det seg fleire dører, og nokre av oss fekk klemt inn ei lita økt på Vigra om ettermiddagen. 


 I tillegg til oss på Synesholmen: Kyrre og Kirsti var på raid på Skjongholmen og leverte i hengar på Ytterland, Johanna, Evy og Nils-Kristian med fleire rydda på nordsida av vågen. Veldig bra innsats!

Vi tok siste runde oppsamling på nordsida dagen etter.

Paradoks - verna natur - som flyt full av søppel

Plast i solnedgang - så får vi håpe at plastforsøplinga og snart tek kvelden. 

Det var heller ikkje så gale som frykta på denne sida av vågen, men vi veit det ligg meir utover mot seglmerket. 

Kart over rydda strandlinje (heil lilla strek, til saman ca 3,5 km) 
og delvis rydda strandlinje (stipla linje)

Monica hadde stålkontroll på det administrative og meldte inn aksjonen på ryddeportalen til Hold Norge Reint. Koordineringa og hentinga som Plastfritt Hav står for, gjer det mogleg for oss å rydde meir. Grunneigarane er positive.

Oppsummert:
Området ser bra ut - men vi finn framleis mykje plast. I år var det mykje mindre mengde. Det var tydeleg at vi samla samen forsøpling frå mange år i fjor. I år var det færre trålnettbitar og mindre landbruksplast og færre store gjenstandar.

Ellers er det litt av alt: 

  • Flasker (brus og vaskemiddel av ymse slag)
  • Kanner (typ 5 liters)
  • Brus/ølboksar
  • Pakkeband (men mindre enn tidlegare)
  • Q-tips
  • Korkar
  • Små grønne tynne taustumpbitar (enormt mykje av desse - overalt!)
  • Tau og trosser i alle lengder og fasongar
  • Udefinerbare plastbitar
  • Mat- og snopemballasje, også kaffekoppar, gatekjøkkenemballasje
  • Små isporbitar (men mindre enn frykta av dette!)
  • Leiketøy
  • Sko og støvlar, blå overtrekkspose til sko
  • Sportsutstyr
  • Plastbæreposar
  • Fiskekasser og delar av desse
  • Snusboksar (men ikkje så mange)
  • Udefinerbare små og halvstore hardplastbitar
  • Brøytestikker
  • Plastrørbitar i alle fasongar
  • Restar av haglpatronar
  • Små kvite dingsar som kjem frå renseanlegg
  • Blåser



lørdag 16. februar 2019

Laurdagslykke på Lepsøya - frå fjøre til fjells

16.02 Etter nøye analyse av vermelding og føreforhold vart det fjellsko og tur ut i havet. Eg har hatt Lepsøya på ønskelista i lang tid, og endeleg vart det. Det høljregna om morgonen, men vi stolte på yr.no og la i veg. For ein dag det vart!

Lepsøya frå ferja

Vi starta på Hellevika ved Ivergarden. Flott gard, og vi lurte litt på kva arrangemtn vi kunne klare å få lagt hit?  

SLIK! Slik skal ei privat parkering skiltast...


Omlag det første vi såg var to feite otrar som hadde formiddagsmat midt i stien. 

Keila med gamle nausttufter. 
I området her ute var det eit lite fiskevær, med fastbuande i alle fall frå 1400-talet til 1750-åra. Nausta var i bruk til 1900-talet. 

Vakkert sjølv om det var skuggesida. 
Veldig glatte steinar, så vi hadde eit par spektakulære fall begge to. Risikosport. 

Det tok ikkje lang tid før vi kom ut i sola og kunne vandre på store blankskurte svaberg. Det var tung dønning og eit heftig brus frå sjøen

Flott og rått!!

Spennande geologi med både små og store formasjonar.

Synnøve hadde vore her ute før, i 2017 og hugsa vestsida som svært forsøpla. Det var tydeleg at strendene no var rydda. Inntrykket i hovudsak var reine strender. På vestsida låg det trålnett/garn og plastkasser. Det skein i grønt og blått med jamne mellomrom, men avfallet var tydeleg samla i depot, og her har nokon ein plan!  

 Denne kassa stod strategisk til rett ved stien, og då vart det fart i plukkefingrane våre og. Vi tok det som låg i nærleiken og fekk det oppi boksen. Godt døme på å bruke det som rek i land som ressurs. 

Plastflasker, dokkekroppsdelar og små bitar av ymse plastprodukt. Foto: Synnøve

Stranda her heiter "Raket" og det var mykje plank og treverk og ein del plast - i hovudsak frå fiskeria. Det såg ut som ferskvare det meste. Synnøve var imponert over kor mykje som var rydda sidan ho var her sist. her er det magne som har gjort ein stor innsats! Det er kjekt å sjå at det nyttar. 

Sola hadde fått tak og det dampa av terrenget og av skjera utanfor. Vårleg og fint!

 
Lepsøya hadde mykje å by på. Fossefall og "Porten", ein lokal variant av "Kjeragbolten"

Stranda med mykje rek, og mange spor etter skikkeleg gamle dagar. Heile strandflata ber spor etter folk, med dyrka mark, hustufter og ei rekke gravrøyser. 

På slike dagar er Ivar Aasen sine ord om nordmannen dekkande. I sjela og i beinmargen, kjensla av å vere del av ei lang historie med rotfeste i kystkulturen.   
Mellom bakkar og berg utmed havet, heve nordmannen fenge sin heim,
der han sjølv heve tuftene grave, og sett sjølv sine hus oppnå deim.

Han såg ut på dei steinute strender; det var ingen som der hadde bygt.
" Lat oss rydja og byggja oss grender, og så eiga me rudningen trygt."

Han såg ut på det bårute havet; der var ruskut å leggja utpå;
men der leikade fisk nedi kavet, og den leiken, den ville han sjå.

Fram på vinteren stundom han tenkte: Gjev eg var i eit varmare land !
Men når vårsol i bakkane blenkte, fekk han hug til si heimlege strand.
(Ivar Aasen)

Rønstadhellaren - med innlagt dusj for dagen. Flott hellar!

Også her har turistane sett sine spor - rein vandalisme. Sjølve hellaren var tørr og fin. 

Rønstad, med melis på Gamlemsveten bak der

Rett før bygda tok vi stien opp mot heia og fjellet. Vi hadde ein ambisjon om å komme oss til topps. Vi skulle ikkje langt opp i lia før det var frose og etterkvart meir og meir nysnø.

Heia

Mot toppen. Frå vår til aarktiske forhold på eit blunk. Nok fjell til å få opp puls og pust. 

Vakkert! 

Med sola i ryggen og månen som vegvisar tok vi oss til topps. Påskelys, men februarkald nysnø. 

Her kjem Nordøyvegen etterkvart
  
På heimveg fekk oppvisning av ettermiddagssola.  Ein verdig finale på ein innhaldsrik og fabelaktiv dag ute i havet. 

12 km i luftlinje, ca 550 høgdemeter alt i alt. 
Vi tok ferja 10.40 frå Skjelten og hadde god til før ferja 17.20 på returen. Då gjekk vi roleg og jamnt med ein kort lunsjpause.