Viser innlegg med etiketten Haram. Vis alle innlegg
Viser innlegg med etiketten Haram. Vis alle innlegg

mandag 24. august 2020

Julinatt i naturen

17.-18. juli 

Hengekøyenatt på Bjørnøya var målet. Eg var sikker på at det var mykje tre der, etter padletur i vår. Då vi kom bilvegen på andre sida av øya såg det annleis ut. Vi fann ein sti og var snart på toppen av øya! Flott utsikt. Tvilen om hengekøyeterrenget vart sådd. 

Frå toppen av Bjørnøya

Vi tok sikte på bukta, og at det ville ordne seg. 

Fin kveld på trass av den iskalde vinden. Vi  fann ein gammal bålplass i le av ein stor stein. (Foto: Synnøve)

Vert det solnedgang? (Foto: Synnøve)

Solnedgangen vart kort og intens - flott ildkule i havet. 

Deretter måtte vi varme oss på bålet før vi tok kvelden. 



Soloppgang i buskfuruland

Det var mange andre små kryp som og stod opp med sola, og eg måtte på med myggnettingen. Buskfuru er heller ikkje av dei mest kraftige kompakte treslaga, så kvar gong eg snudde meg svaia det voldsomt. 

Myggnetting - og ny sjanse til å sove seg frampå. 

Amok-køya går ganske i eitt med terrenget (Foto: Synnøve)

Morgunstund er gull! Ingen vind, varme i sola, nytrekt kaffi. Livet er godt. (Foto: Synnøve)

Vi runda av med eit bad. Ei av læresetningane i Synnøve Lundes uteskule er nemlig: "Man angrer aldri på et bad!" Ein stor rådyrbukk stod i lia og såg på og tok livet med ro. Han kjende seg tydeleg ikkje trua av badande damer.Det er jo heilt sant at ein ikkje angrar på eit bad, sjølv om dette var av sorten som er best når det er unnagjort.    

Turen  vart runda av med å tasse gjennom kulturlandskapet på skogsbilveg og god sti, som vi burde ha funne dagen før. Øya var synfart frå landsida og sjøsida, kryssa to gonger på tvers og vi hadde vore til topps. Fram til 1965 var ho del av Borgund kommune. Spor etter tysk kystartilleri frå 2. verdskrig står att på nordsida av øya. 
 

Fint kulturlandskap

torsdag 27. juni 2019

Lepsøya rundt

14.-15 juni Vi nyttar alle vervindauge til å vere ute! Fleire har rusta seg for campinglivet og eg har vore på alt for lite teltturar dei siste åra. Etter å ha lodda stemninga var vi tre som la i veg frå Roald med mål om å utforske Lepsøya. Det er ikkje så langt over, men Vigrafjorden er ofte skvalpete og vindfull, og det er sjeldan eg padlar her.

Avreise frå Roald - ut på eventyr!

Liv i sjøen over Vigrafjorden, sjølv på ein fin dag

Lepsøya i sikte!

Beinstrekk nedanfor Rønstadhellaren.

Her er altså hellaren..
Flott plass, og mogleg camping. 
Men vi syns det var for kort padling og for tidleg på kvelden til å gje seg, og iskald nordavind fall ned frå hamrane.

Både Torunn og Roger har vore på Lepsøya på skuletur i ungdommen, og eg gjekk rundt øya i vinter. Så vi fokuserte på sjøvegen - som var ukjent mark for oss alle. Nordavinden var i periodar seig, medan vi padla langs gamle gravrøyser og dungar med oppsamla plast. Plastpiratane her ute gjer ein enorm ryddejobb!!
  
Skikkeleg HAVpadling. Flott lys, og vinden løya etterkvart. Vi fekk ein liten smakebit på dønning frå storhavet då vi runda nordvesthjørnet av øya.

Nytt fyr på lista!

Hellevik fyr - i privat eige. 

Vi satsa på leir på Kjerstadsanden, og som vanleg gjekk tida fort og kvelden kom brått. Det var godt å trø seg i land på berga ved stranda og konstatere flatt nok gras til minst tre telt! Dårleg med ved var det, men simsalabim så dukka ein av plastpiratane opp, og då ordna det seg med ein vedsekk. Små plassar og kjentfolk altså! 


Kjerstadsanden
 
Junicamp I. Flott lys ved ankomst...

...vart til nydeleg flammande solnedgang. 

Bål, mat og prat. Ungar som leika på stranda. Eit cruiseskip som seig forbi. Kvalitetstid. Sommarstemning.



Eg vakna av at det var sol, alt for varmt i teltet og havblikk!! 
Det måtte bli morgonbad! Det vart det, og det var IKKJE varmt i vatnet... Soltørking på varme berg tinte oss opp att. 


Morgonstund...

Test av expedmadrasser i ulike storleikar og variantar. Foto: Torunn

Eg tolka stemninga som god, både i camp og då vi kom oss på sjøen att. Håpet var sjølvsagt at begge skulle få smaken på campinglivet og nye turar? Det såg lovande ut. 



Med vinden i ryggen og ny vinkel på Sunnmørsalpane runda vi austsida av Lepsøya. 

Nordøyvegen under bygging. Det var pæling og eit veldig til bråk i området. Så då vart det politikkdiskusjon. Samstundes var det naturreservat på holmane og eg hadde ikkje samvit til å stoppe innanfor reservatet for naudsynt ærend. Verda er full av paradoks.  

Anleggsmaskiner i fleng - Nordøyvegen under bygging

Beinstrekk

. Solveggen - varmare enn Syden!! Foto: Roger

Vigrafjorden var i sommarlune, og vi hadde ein lett bris i ryggen heile dagen. 

  Det var varmt og deileg og lettpadla - heile vegen heim!
Solmøre! Sommarpadling! Himmel og hav for eit liv!

Turen vart omlag 28 km. Måtte det bli MANGE slike framover! 

onsdag 26. juni 2019

Grilltur på favorittholmen

6. juni fekk vi sjansen på å tjuvstarte på sommaren. Det var knallfine vermeldingar, med over 20 grader! Vi for ut med grilling og bading i blikket. Padling i T-skjorta var akkurat mogleg, men heller ikkje meir. Middagen ute var stor suksess - og eg har no avansert frå grillpølse til burger! Sunnmøre leverar ofte mange årstider på ein dag - og denne kvelden fekk vi ein skikkeleg floing i fleisen på heimveg. Håpar det vert mange middagar ute i løpet av sommaren - det var både kjekt og sosialt, med ein god dose trim!

Sommarpadling!
 
Favorittholmen!



Kyrre gjekk for bål...

...eg gjekk for grill! Veldig fin liten sak det her. 

Middag i det fri! 100% suksess!

Nydeleg - og lovar godt for sommaren som står for døra

Ups...? bading vart avlyst og vi fekk massa motvind og skvalpesjø på veg inn att. Valderøya tok ikkje av i det heile for vestavinden. Rart, men slik var det. 

Alle padla frå "si" hamn , og eg frå Knutneset. Turen vart ca 16 km t/r 

tirsdag 30. april 2019

Vår og bål - på Kalvøyholmen

16.04 Ettermiddagstur med fyrstikker, grillpølse og rekognoseringsbriller på! Det har vore mykje surf og leik ei stund, så det var på høg tid med turpadling og kvilepuls. Det var "nordavind" midt i mot på veg utover så det var blytungt i kryssingane. Eg tvilte på at dte vart pause ei stund der. Mot kvelden stilna det av og vi var på rett stad til rett tid! Båling, mat og silkeføre i solnedgangen heimover att.

Start på Knutneset - Ålebyen midt i mot

Gamle sentrum på Valderøya

Kjeholmen

Flott! Nordavindsblått!

Det stilna og vart perfekt for grilling og pause
 

Floa tok restane av bålet - perfekt berekning. 

Flammehav og veldig kult lys!


Magi!


Det vart heilt tussmørkt før vi kom heim og nydeleg! Eg ville eigentleg vere ute heile natta, men var samstundes segneferdig, og det var berre såvidt eg orka å bere opp kajakken. Vår!  

Turen vart 16 km.