Viser innlegg med etiketten Grete. Vis alle innlegg
Viser innlegg med etiketten Grete. Vis alle innlegg

lørdag 4. april 2020

Øyatausene på skitur

4.04 Det er ein flott gjeng med aktive folk på øyene her eg bur. Palmelaurdagen rotta vi damene oss i hop til vår første felles skitur. Korona-tiltaka betyr maks 5 i lag på tur og ein i kvar bil. Rart å møtast utan å kunne gje kvarandre ein klem. Skiløypene frå Brauta var nypreppa, men det var eit merkeleg føre. Gammal kald snø i botnen, vår i lufta og våt nysnø som kom dalande. Skismøring i alle valørar frå blått via lilla til raudt var i bruk, med varierande resultat. Dei som hadde felleski fekk nokre småmisunnelege blikk i oppoverbakkane. Vi fekk 15 minutt med varmande påskesol rett i fleisen då vi åt nistepakka - og det var ein fortreffeleg kjekk dag i godt selskap i skiløypa. Dette kan vi gjere fleire gonger!

Ut på tur! Astri har vore i løypene før.

Idyll ved Tjønnebru

Humøret betre enn festet på skia! Men vi kom oss både opp og rundt! 

Varierte og fine løyper rundt Mevatnet

✔ Påskestemning!  Foto: Torunn

søndag 20. oktober 2019

Havsteinen

20.10 Lat søndag. Kva med ein tur i nærområdet? Rett utanfor der eg bur ligg faktisk ei bittelita øy som eg aldri har padla til: Havsteinen. Det er kjekt med oppdagingsferd og besøk på nye plassar! Då vi for ut var det ein flott og solfylt haustdag, men det vart fort grått og hustrig. No er det berre å akseptere at sommaren er på hell og vinteroppsettet må vere klart! Tur er topp, men no utover er det greit å halde seg i rørsle.

Havsteinen - arkivfoto (august 2018)

Flott oktobersøndag på Sunnmøre!

Herleg på fjorden, rett utanfor husdøra. 

Det kunne jo ikkje vare, vi såg det kom ymse i horisonten

Fjæreplyttar? 

På toppen av øya satt det to ørner og flørta med kvarandre medan dei heldt eit auge på oss. 

Hey hey! Her kjem det fleire! 

Kort kald beinstrekk og niste på land. Eg fekk ikkje med meg nokon på topptur, med argument som dårleg fottøy o.l. Så eg må utover hit ein gong seinare, med meir enn neoprensko på lur!   

Om dagen vart gråare så gjorde det ikkje noko. Vi stiller med eigne haustfargar. 

Alnesbygda glitra i horisonten

Snirkling

Havsteinen ber namnet med rette - det er ein stor stein!

Ut på tur - aldri sur! Foto: Tommy

Tur/retur 8 km. 
Førstereis til Havsteinen unnagjort. Perfekt tur på ein litt lat søndag. 
 

tirsdag 30. april 2019

Ellingsøyfjorden - Kvalstein - Langøya

18.04 Ingvild og Espen inviterte til tur frå Kvalstein på Ellingsøya. Flott utgangspunkt, flatt hav, fine folk og årets varmaste dag! Heimepåske er gull!

Fin strand og veldig varmt! Skal/skal ikkje i tørrdrakt..?

Lekkert innover Ellingsøyfjorden - vi padla frå øy til øy.


Strandhogg på Langøya

Denne dagen førsøkte eg å ta det optimale gruppebilde på sjøen. Det er ikkje så lett å formidle kor kjekt det er å vere ein gjeng som sklir gjennom sjøen, pratar litt, nyt livet og ser seg omkring. 
 
..det vert fort små svarte prikkar

Framom er kanskje betre? 

...eller når gruppa padlar gjennom noko? Ups, der var eg bakerst att. 

I mindre grupper er kanskje betre?

..eller fungerar det å spre padlarane langs heile horisonten? 

....eller med min eigen kajakk som kan peike og gje djupne i bildet? 

Korleis vert det med fjell som bakgrunn?

...er er det betre om ein får med litt tare? 

Førebels konklusjon er at det er krevjande å ta bilde av padlegrupper, og eg må jobbe meir med dette. Ingen av bilda gjev rettferd til kor fin dagen og stemninga eigentleg var. Og alle visste at det låg fridagar på rad og rekke og venta på oss!

Påskepadleglede ved Grete

Mange på sjøen - og ungane som fiska lurte på kvifor i alle dagar vi padla. Godt spørsmål. 

Hege tok ein for laget, og rulla påska inn! 20 i stil. Slik ser det ut når ein IKKJE prøvar å komme opp med hovudet først! Eg ser og lærer...
 



Turen vart 11 kilometer. Takk for supert initiativ og ein strålande dag!

fredag 26. april 2019

Kortreist påskepadling

22.04 Påska og våren er ofte den aller finaste tida på Vestlandet. I år slo det til for fullt, og vi fekk full sommar og t-skjortever på toppen! Mange i padlegjengen hadde heimepåske, så det vart turar både i aust og vest, og sosiale kjekke dagar. Finalen tok vi likegodt i skjergarden mellom Giske og Haram, som er eit utruleg flott område med holmar og skjer og nokre større øyer.

Fin gjeng på sjøen, frå "downtown" Valderøya

Kjeholmen

Vraksafari - slik gjorde dei det før i tida..

Fleire i gruppa hadde barndommsminne og masse lokalkunnskap frå området, så det vart mange gode historier langs med utover dagen. 

"Kongen" helsar på - og flaug rett over hovuda på oss

Snirkling og korte kryssingar i vindstille og sol! 

 
Lekkert I! 

Lekkert II

Silkeføre. Passe fort, passe langt. 

Fløyelsfjord

Grønneguiden og damene

Kalvøyholmen vest - flott plass for strandhogg i dag! (Og eg hadde ein bitteliten baktanke her..)

Grilling og skrøner frå Nord-Norge. No har vi lært kva som er problemet om bålrøyken følgjer oss...

Det var nesten for varmt i sola, og deileg å slappe av. Vi hadde med hanskar og ryddesekkar, men det var nesten feil å dra i gang rydding på ein slik sommardag. Etter litt nøling tok vi det fram og vipps var heile gjengen i gang!

Rydding pågår! Foto: Jan Roger

Holme er pepra med isopor, og sjølv om Mildrid og eg rydda her i oktober så var det dessverre lett å finne mengder. 

9 stk - ein time rydding. Då hadde vi dekt eit par hundre meter strandlinje og pakka saman 9 sekkar + diverse kanner og store isoporbitar. 

I terrenget - overalt. Det er nesten umolgeg å plukke opp. 
Eg trur eg skal gå til "krig" mot dårleg avfallshandtering av ispor. 

Det var ein slik dag som kunne vart evig, og ingen ville eigentleg heim. Eg synes det var utruleg kjekt at vi fann roen i mange timar på holmen. 

Det er fine folk eg padlar med, men merkeleg nok er dei meir interessert i å rydde plast enn å bade. Så badinga måtte eg ta ansvar for aleine, under lett press frå Ingvild og Roger. Ikkje avskrekkande kaldt, men førebels nok med einsifra tal svømmetak. 

Aprilbad: Foto Ingvild
  
Etter at vi har vore her: det ser bra ut! 
Vi har etterkvart fått taket på sporlaus ferdsel! 
Rettare sagt: Det var ein stor skilnad: langt meir plast og rusk i området då vi kom enn då vi for. 

På heimvegen traff vi eit flytande kar frå Hofseth biocare. 
Vi har sendt beskjed til dei, no er eg spent på om dei hentar avfallet sitt. Ei bedrift som heiter "biocare" KAN rett og slett ikkje strø om seg med plastavfall i sjøen. 

Glitrehav, medsjø og medvind. Heimvegen gjekk som ein leik!

Snirkling - Tommy!

Samling før kryssing av skipsleia. 

Vi klarte det nesten. Å padle å samla over. 

Der det kan padlast gjennom osv osv...

Teambilde!! Foto: Tommy

Takk for ein fantastisk dag! 
Påskepadling med plastrydding og pølsegrilling var ein perfekt finale på århundrets til no finaste påske i vest! 
14 kilometer.