Vårpadling rundt Store-Kalvøya

6.04 Vår. VÅR!!!! Solskinn og vakkert ver. I år har det vore få slike dagar, så vi nytta sjansen og heiv oss i kajakkane.

Skjergarden aust om Valderøya og fjella på fastlandet innafor.

Lene og leia (Foto: Roger)

Vi hadde med segla, og med vinden i ryggen kjendes det ut som bra forhold! Det viste seg fort at vinden kom i kast og rykk og napp, så det var meir styr enn moro

OÆÆÆÆ! Totalt ukontrollert i det eg tek opp kamera.

Før vi rekk å pause bles det opp, så vi søkte ly i hamna på Kalvøya for nistepause. Før vi rakk å komme oss vidare bles det opp meir. Eg vart tatt litt på senga av heftig motvind då vi starta opp att. Så heftig at eg ikkje kom meg av flekken. Lett rysta gjekk vi i land og sjekka yr.no. Snack og meir klede, og ny strategi for motvindspadling heim. Vi tok eit strekk om gongen, frå holme til holme. Det gjekk fint, og vinden gav seg litt, men eg måtte jobbe litt ekstra. 

April kan vere lunefull og frekk,

han skal jo jage vinter'n vekk!

Varm og lys og snill,

i neste 'blikk heilt vill!

Ladar opp til sommarfest,

med freidige kast frå sørvest.

13 km (Endomondo, Roger)

Mørkepadling III

27.11 Rundt Valderøya med fin gjeng. Litt variabelt med vind og bølger. Traff på tidspunktet då alle tre hurtigbåtane skulle innom kaia. Ekstra krydder med ryggvondt og tauing. Flott måne og etterkvart stjerneklart. Verkeleg klart og nordlys vart det først etter at vi hadde komme heim. Kjekt å kjenne på at ein vert meir komfortabel i mørket etter nokre kveldar ute. Friliftsliv i vinterhalvåret er gull. 

Runden rundt ca 13 km. Eg prikka med det inn akkurat 800 km for året - så langt!!!

Mørkepadling med kart og kompass

17.11 Stille, klart og nesten fullmåne. Flotte kveldar og silkeføre på fjorden. Det vert ein ekstra dimensjon med padling i mørkret. Vi for ut med kart, kompass og ein del punkt vi skulle innom.

Mykje læring: Det var artig å navigere litt. Det er lett å gå på for lange kompasskursar i staden for å navigere etter terrenget. Det er ikkje så lett å lese kart/ta ut kursar i mørket. På planlagde turar kan ein godt gjere litt førarbeid heime. Vi padlar litt fortare enn vi trur når vi vert ivrige. Det er ikkje nok å ha kontroll på hovedleia, det kjem båtar i bileiene og. Vurdere avstandar og fart på båtar er ikkje lett, heller ikkje å vurdere retninga dei har ut i frå lanterneføring. Slepebåtar har anna lanterneføring.

Fantastisk kveld på sjøen! Det gav meirsmak med orienteringsoppgåver langs med. Vi har nokre idear til neste gong. Turen vart totalt 16 km. 

Torunn testar Skim Differ

1.09. Turunn er ganske fersk padlar, så eg nytta høvet til å dra ho med på søndagstur og introdusere ho for Pippi! Eller kven som drog med kven kan sikkert diskuterast. Grått, vått og vind,  men godt å vere ute nokre timar. Håpar det vert fleire turar på oss etterkvart!

Dei kler kvarandre godt i grunn? 

Meir info om Skim Differ her - Pippi er Carbon Light. 

Sommarnatt på fjorden

21.07 Eg har i lang tid blinka meg ut ein holme i nærområdet som perfekt til båling og sosialisering. Brått var det både ferie og finver samstundes, så eg lodda stemninga. Jammen var det ikkje ein heil gjeng som ville vere med ut på tur. Heimeferie er aldeles fenomenalt, når vi bur som vi bur, midt i indrefileten.

Fjorden full av folk på ein laurdagskveld!! 

 

Fornøgd gjeng! Organisering: Monica. Foto: Audun. 

Holmen fann vi, like fin som eg trudde - i alle fall i mine auge. Men eg var bittelitt bekymra for lite ved, så eg måtte hente litt på naboholmen i tilfelle. Båling har jo vore fobode heile sommaren, men på eigen holme i flomålet må det vere innafor, sjølv i ein tørkesommar. 

Vedhenting. 

Grusom jobb sjølvsagt, men nokon må ofre seg. Kjekt å sjå fyrstikksiluettane til dei andre og høyre på kjatring og fliring som sprer seg over bukta. Sommarkjensle av type perfekt. Fine folk. Magisk lys. Måtte klype meg i armen. Sjeldan ting som eg fablar om vert så bra når det vert realisert. 

Betre vert det ikkje...

Astrid sørga for kveldens bilde av meg og. Smilemusklane fekk køyrt seg. 

Alle tok ved-ansvar, og jaggu vart det bål. Heile kvelden. Både på himmelen og i flomålet. 

Noko som var heilt naudsynt for å halde ein billion bittesmå fastbuande på tilstrekkeleg avstand..

Det som skjer på holmen, blir på holmen. Nokre ville overnatte, resten padla heim i svartaste sommarnatta. Lys var det dårleg med, så det må inn i standardoppsettet no. Det var nesten tropenatt, og HEILT stille på sjøen. Uverkeleg. Nydeleg. Nattpadling er undervurdert. 

Valderøya i sommarnatta

Gryande soloppgang...

Kalvøyholmen kjem til å få meir besøk av meg - flott plass! 

Eg padla totalt ca 18 km denne kvelden. 

Desemberrulle 2017

20.12 Nydeleg dag, og den siste på langtidsvarselet. Eg nytta dei siste avspaseringstimane og for heim for å rulle. Det er litt greiare når eg tør å rulle aleine, og har ein plass i fjøra i gangavstand frå heimen.

Godsida

Vrangsida - sjekk

Vrangsida i solnedgang

Denne dagen mislykkes eg i å ta stormrulle og shotgunrulle, men fann at ei anna ro under rullinga. Desemberrulling i boks og STOR rullemotivasjon inn i 2018!

Nyrulla og juleklar!

Valderøya Julespesial - skitur i havgapet

22.11 Medan alle andre førebur seg på advent og jul, førebur eg meg på ny jobb og flytting. Litt greit, og litt trist. Eg likar adventstida. Men det er plent umogleg å pynte og flytte samstundes. Sidan eg allereie er på etterskot med alt, så ser eg nokre avgrensningar der. Fredag fekk eg på vinterdekka, og det kan ein seie var "just in time". Fredag kveld var det kvitt på bakken og laurdagen lava det ned. Eit herleg vestlandsk nullføre og for nokre mengder snøv det vart! Sjokk 1: Det ER snart jul. Sjokk 2: Det kjem til å vere SNØ om vinteren i Nord-Norge med alt det dragset som høyrer med.

Søndagen var det definerte byger og herleg vinterlys i mellom. Eg fann ski i boden og fekk sjokk 3: Ikkje klar til å gå på ski - må fikse av med voks, på med smøring, lim på feller m.m Då eg endeleg kom meg avgarde var noko av magien vekk. Eg satsa på topptur på Valderøya, og det vart strabasiøst. Det var snø til over knea, heilt mjuk snø. Snø fullstendig utan bæring. Det har vore snakk om manglande "såle" på diverse fjelltursider. På Valderøya var det ikkje berre manglande såle, det var så blautt i myra at eg sank nedi sjølv med ski! Bortsett frå der det var berg, der sank eg ikkje nedi, men skrella stålkantane så gnistrane fauk. Det var rimeleg tungt med 40 cm snø og 10 cm myr som skulle forserast for kvart steg, og eg var sjeleglad for at eg ikkje skulle så langt. Mot toppen fekk eg den interessante øvinga med gjennomslag i snø, deretter gjennomslag i meterhøg einer. Signalen var målet, og den fekk vere topptur god nok! 

Eg held varmen, og det var hyggeleg med ein Valderøya julespesial, sjølv om det gjekk på kreftene laus! 

Kamuflert byggefelt og noko så eksotisk som ein snøfresar!

Idyll å sjå til

Eg nektar å la meg psyke ut av dårleg føre

WOW!!

Vintersol på Gamlemsveten

Valderøya Julespesial

Til topps med ski! 

Ja, det klabba. Det var akkurat like kaldt på toppen som på ein 1000-meterstopp. Det vart ikkje noko fart ned att heller. God meistringskjensle likevel. 

Varden på toppen

Det magiske lyset forsvann i ei byge. Sjeldant syn med kvittkledde øyer i Giske. 

Godøya

Skjonghellaren

26.05 Karianne var innom på lynvisitt, og vi ville lufte oss etter middag. Attraksjonen på Valderøya er i grunn Skjonghellaren, så då gjekk vi dit!

The cave Sjonghellaren near Ålesund is one of the largest on the westcoast og Norway. Surreal place. People have been tagging their names on the walls for decades. Arceologist have found traces from fish and birds dating 30 000 years ago, before the last ice age. Findings confirm people living here from the early Iron age.There is easy access to the cave - only 20 minuts walk on gravel path from the parking at the stadion at Valderøya. 

Det ser ikkje så dramatisk stort ut før ein kjem heilt opp. 

Heile hola er tagga ned gjennom dei siste 100 åra. 

Eg skjønnar det verkeleg ikkje, kva er det folk tenker på?

Wikipedia: Skjonghellaren er ein av dei største på vestlandskysten. Det er metertjukke lag med lausmassar frå mange tidsperiodar i ytre del av hellaren. Her er det funne knoklar av dyr og fuglar, opptil 30 000 år gamle. Dette er nokon av dei eldste funna av fauna i Norge. Alkekonge og polarlomvi er dei mest tallrike artane i funna. Det er og funne restar av sel i hola. Er det isbjørn, polarrev eller menneske som har drege beina inn i hola? Det er spor etter flittig bruk av hola i eldre jernalder, mellom anna reiskap, gruer og bein av fisk, vilt og husdyr.

Solopadling (for aller første gong!) på St.Hans

23.06. Eg har trødd rundt nokre veker og tenkt på at det er på høg tid med mi første solopadling. Eg har ei skulder som knirkar, og for å halde fokus på teknikk og øving er det kanskje greitt å halde på litt sjølv? Samstundes så sitt det langt inne å fare ut i kajakk aleine.

Skeptisk. Er dette så lurt då?

Eg kan trille kajakken heimafrå og nesten ned til sjøen på veg. Det er greit. Men det er dette med nesten. 20 meter med kratt før storsteinfjøra er eit faktum. For å retteleg sette meg på prøve så var det og maks fjøre denne ettermiddagen. 

Mogleg eg kan lære å like padling aleine, men SJAUING av kajakk aleine er noko drit. #ringeinvenn

Ho stod støtt på "dei steinute strender, og såg ut på det bårute havet...."

Det er vel berre å hoppe i det..

Valderøya frå sjøsida vert spennande! Eg innser at eg har brukt enormt mykje mindre tid i det næraste nærområdet mitt enn svært mange andre plassar. Kajakken oppfører seg fint og akkurat som vanleg sjølv om det ikkje er med nokon andre på turen.

Det mest sjarmerande bålet denne kvelden. 

Ny og gammal næringsutvikling.

Jøss - ungdommane på Valderøya ror ut teinene sine med handemakt gitt! Poeng!

Faktisk forskning viser at på Valderøya er det "Kvar mann - sitt bål!" Det var kanskje ikkje dei største båla langs stranda, men gurimalla så mange. Folk rigga seg til i naust, med plastikkstolar i leveggane og var ute langs sjøen rundt heile øya (10 grader og frisk bris er ikkje HEILT syden).

Det å padle solo gjev ikkje strålande padleteknikk av seg sjølv. Eg kjente att alle utfordringar frå sosial turpadling: Problem med å halde jamn rytme, alt for låg åreføring (når ein skrubbar knokane på dekksstrikken så er det i lågaste laget), problem med å finne jamn bevegelse på høgre og venstre side osv. Sidan dette var ein testtur slo eg fort fast at dagens oppgåve fekk vere å idenfisere utfordringane - løysinga får eg ta ein anna dag. 

Første langside var motvind, deretter medsjø og medvind i Gjøsundet, og medsjø utan vind på siste langside og ein dæsj motvind før eg var heime att. (Karakterbyggande, vert det sagt)

Godøya frå litt ny vinkel

Opptenning klokka 18.00 av samtlege småbål på Sjong.

Gjennomført solopadling! #godtnøgd #overlevd

Litt meir faktisk forskning til eige bruk: 

Vermåling på Vigra St.Hansaften

Runden var 13,5 km og eg brukte akkurat 2 timar (med Shuna). Så får vi sjå om rundetida går ned etterkvart? 

Eg gjorde ein taktisk bommert med å padle vindsida opp mot vinden. Eg burde padla mot vinden på le-sida av øya og fått finfin medsjøpadling på vind-sida.