Runde rundt

19. juli. Frå padling i Herøy i Nordland til padling i Herøy i Møre og Romsdal. Etter råd frå yr.no hadde vi komme oss sørover. Britt kom opp frå Askvoll, og Tor Inge og Mildrid vart med frå Ulsteinvik og Herøy. Fin gjeng. Nina har vore gira på grottepadling på Runde sidan vi var der i fjor. Det store spennande spørsmålet no er forholda. Kor fort legg det seg etter vekesvis med kuling?

Nina på veg utover

Vi for ut frå stranda, under Rundebrua, og fekk svaret: Ikkje fort nok. Det var greie, men store forhold. Dønning på vel meteren braut i berga og gav skum og rotesjø. Ingen grotter i dag nei.  Det var sopass sjø at eg nesten ikkje har eit einaste skarpt bilde frå turen.

Det var altså ganske store forhold, sjølv om det ser klin flatt ut på bilde.

Britt forsvinn i horisonten

Fugl i fjell

Og fugl i lufta. Fleire gode grunnar til hjelmbruk i dag.

Fuglefjellet på Runde er i ferd med å døy. Artane slit med å få fram ungar, det er for lite (rett type) mat til dei i sjøen, og fuglane i fjellet er vaksne og gamle. Rekrutteringa har svikta i mange år, men den høge levealderen på fuglane er med på å "kamuflere" det. 

Framtida på Runde - artikkel i Sunnmørsposten

  

Vi rundar inn til fyret, og er ferdig med den største dønningen for dagen

Både DNT-nøkkel og fyr-nøkkel er med. Fyrmeisterbustaden er DNT-hytte, og det er ein dryg time gange over fjellet for å komme dit, for dei som ikkje padlar. Meir enn 20 sengeplassar og fin "hytte".

Frå nyfyret mot gamlefyret

Frå fyret til fyrmeisterbustaden. Jorda ER visst rund.

Fyra - kysten sine katedralar?

Mykje glas som skal haldast..

Men litt usikker på om dette er kuriosa frå gamle dagar eller framleis i bruk

Dagens mest innpåslitne ørn

Tor Inge i farta

Då vi fer ut att sett Tor Inge kursen beint opp i det kvitaste han finn. Britt har ikkje padla så mykje med oss før og stiller spørsmålet om kvifor? Er det ikkje betre/lettare vegar ut? Når resultatet av leiken vert tarestopp så har vi eit forklaringprblem. Det er berre slik at det er ikkje alltid den enklaste vegen vi vil gå... om det finst ein artigare variant. 

Godt planta

Mildrid fortel og viser oss filminnspelingsplassen for "Vaffelhjarte"

Burde ikkje de heller vore borte i fuglefjellet og hekka?

På Rundetur nr 3 vart det endeleg Runde rundt!

16 km

Turen var mykje finare enn bilda denne gongen. Grotter og snirkling har vi tilgode, og Nina må oppover på ein ny tur.

Sjekk turen i fjor for korleis det også KAN vere å padle på Runde.

Flåvær

Tirsdag 10. juli. EIN tur til før alle fer på sommarferie? To bilar med kurs for Herøy og Tor Inge, og 5 stk med fyr og ukjent farvatn i blikket. Vi vart litt distrahert på Ystute - for det hadde nett komme ei last med nye kajakkar til butikken. Lekre saker, og freistingane låg i lufta.

Flåvær var målet og Trude fekk prøve Nuka (utan skeg). Vi padla oss ut mellom moderne fiskebåtar og verdas største lakseslakteri på Eggesbøneset (Det står rett nok Norges største på Marine Harvest sine heimesider).

Tor Inge fortel om lakseslakteriet

Ein triveleg julikveld med 10 grader, nordavind og lågt skydekke. Utan skeg var det utfordrande nok å halde retninga på kajakken med vinden på skrått bakfrå. 

Vestlandssommarpadling!

Manglar ikkje på dramatikk sjølv om utsikta var noko redusert. Flåvær i horisonten.

Flåvær handelsstad

Vi kryssa til søraustenden av Flåvær og padla langs holmane nordvestover til fyret. Flåvær fyr ligg ytst på tuppen. Det ser idyllisk ut på avstand, og litt meir forfallent ut på kloss hald. "Dagmar" har herja både med gangbrua og fyrbygget. Det er eit paradoks at Norge hadde råd til å vedlikehalde fyrbygga sine i 1912, men ikkje i 2012... Kystkultur og vedlikehald er eit aktuelt tema.

Fyr nummer fire for sesongen - Flåvær!

Trude på vestsida av fyret

Vi padla rundt og gjekk i land på Warholmen. Tor Inge og familien har eit velstelt triveleg hus her ute. Ingrid sette på kaffi og resten gjekk ut til fyret.

Flåvær fyr frå "landsida"

Det viste seg at Ingrid hadde gjort meir enn å sette på kaffi. Vi kom tilbake til reker, varm loff, og pådekt bord. Veldig koseleg og overraskande. Praten gjekk og det var kjekt å vere på tur. Padlehistorier og familiehistorier gjekk i kvarandre, og ingen såg på klokka.

Det var skymt når vi la i veg innover. Kauking og latter, særleg då "skotten" dukka opp. Det store spørsmålet vart; kva har eigentleg ein skotte under spruttrekket?

Flåvær-skotten

Eg har no erobra fyr nummer 4 og turen var på omlag 11 km. Det freistar med fleire turar til Herøy. Tusen takk til Ingrid og Tor Inge for turen og gjestfriheita på Warholmen!

Flåvær - kart

Ein liten strek i rekninga var det at vi mista alt som var av ferjer, og måtte vente til 2.30 på Hareid. Generelt så kan eg seie at det ikkje er nokon grunn til å legge inn venting på ferjekaia på Hareid mellom 0.45-2.30. Det er relativt lite som skjer der då. Så det var ein trøtt gjeng som kom til Ålebyen midt på natta. Det var likevel så utruleg deileg å berre somle, legge klokka tilside og nyte sommarkvelden at det går eigentleg ikkje an å klage på ventinga heller..

Bølgjeleik på Vigra

Etter ei veke med absolutt dritver, var det håp om gode forhold for bølgjeleik utanfor Blimsanden. Stranda padleklubb stilte fulltallige, ein rykande fersk Ålebybuar og aktivitetsleiar fekk lufta seg, og Tor Inge tok turen frå Herøy. Betre vert det ikkje.

Nesten for fint, kor hadde det vorte av all dønningen? Ragnhild på veg ut frå stranda.

På leit etter bølgjene kom vi over ein ualminneleg kjekk og velkledd gjeng, som viste seg å vere på veilederkurs i regi padleforbundet. Ein og anna kjenning var det og...

Så kom vi til Molnesrevet. 100-vis av meter med brytande bølgje bortover. Spennande!

Molnesrevet braut i alle retnignar, så etter ei stund for vi innover mot Bårevika og leika litt der. Her er Hallgeir på dagens snille bølgje....

Kenneth fekk seg og eit par fine surfar her.

Utforbi Bårevika. Melis på Gamlemsveten. FIIIIINT!

Lunsj, motsjøpadling, medsjøpadling, og brått var vi her. Hallgeir i sentrifuga. Dette gjennomgjekk han heilt frivillig eit par gonger, og kom ut att like blid.... Slike bølgjer er litt utanfor mi komfortsone nett no, men kven veit?

Eg er litt meir her - i småbølgjene inne med stranda. Artig å leike seg her og.

Men det endar jo framleis med litt bading då...

Skatten i enden på regnbogen..... Vi må vel ut å leite etter den?

Kjekt å verte kjent med fleire padlefolk i området! Takk til Tor Inge som passa på å ta nokre bilde av meg og.. Fleire turar under planlegging, og det lovar godt.

I dag padla vi ca 9 km strekning, men då har eg ikkje rekna med noko att og fram på surfar undervegs....

NOTE TO SELF: Bølgjehøgda på yr.no stemmer sånn nokonlunde. Blimsanden er betre med litt meir vind. Bølgjene legg seg tvert når vinden snur 180 grader.

Atlanterhavsvegen og Kvitholmen

Hustadvika. Havblikk. Herleg!

Søndag ville vi ture på eigenhand og Play-kameratane er klare. Vakrare morgonstund kunne vi ikkje fått.

I gang med turistruta - her er gjengen ved Håholmen

Atlanterhavsvegen neste! Toppen til venstre er Melen.

Tidevatn i mot og dønning i ryggen. Interessant å padle under brua.

Ut neste bru. Eit nytt risikomoment dukka opp. Havfiskekrokar i full fart..Tryggast å halde seg litt på avstand frå dei ivrigaste fiskarane...

Familieråd

Tore på havet. Hustadvika nord. Skipsleia bak.

Susan på veg mot Kvitholmen

Kvitholmen har eit fyr, ei fin hamn, ca 20 villsauer og eit vennelag som held fyret i stand. Her vart det lunsj, polarbrødbildetaking, fyrsafari og gjestebokskriving. Rett travelt.

Returen tok vi i strak linje. Tor Inge fann den einaste bølga som hadde stått opp i dag..

Skarveberg og mange små holmar og skjer på Averøysida av kryssinga.

Eg tullar ikkje når eg snakkar om havblikk...

Grønlandsstyle på alle tilbake. Eg padla grønnlandsåra til Susan heile vegen, og var kjempefornøgd. Må ha. Berre MÅ ha..

Kjensle av tidsmaskin når vi runda Håholmen for siste gong..

Turen vart totalt ca 22 km. I godt lag og med fine opplevingar og diskusjonar undervegs.  

Takk for turen!

Her kan du lese Susan sin versjon

Runde

Onsdag 13.juli. Tur til Runde med ein godt blanda gjeng. Heile 5 aktivitetsleiarar var med på turen, og fleire andre kom rett frå teknikk-kurs i helga. Eg gledde meg til å sjå fuglefjellet og hadde eit lite håp om å få prøve meg i litt grovare sjø i løpet av turen.

Gullegod stemning på Runde aust før start. 1,2,3....14 vart vi til slutt.

På veg ut mot fuglefjellet på vestsida. Det kribla litt i magen. Her er eg og padlar ved Runde! Eit eventyr..

Vi fekk kjenne litt på dønningane allereie rett etter å ha passert brua.

Oppunder fuglefjellet. Mykje fugl av ymse slag, og jammen var det ikkje eit par turistbåtar ute på rek og.

Runde fyr

Herifrå og rundt neset til fyret vart det ikkje teke noko særleg med bilder. Faktisk ingen. Dønningane vart større. Endå større. Og kom fortare. Og dessutan skulle vi padle dei på tvers. Forventningane mine om å få prøve seg litt vart innfridd ca 200%. Her var det ikkje snakk om å teste grenser, men å sprenge dei. Ei lita stund der satt eg med ei ekkel kjensle av at her har eg nok med meg sjølv. Det er ikkje bra når ein skal fungere i ei gruppe. Det var omtrent då eg høyrde ei innbitt røyst bak meg: "Ditta skal f... meg på Facebook!!"     

Landing på Kvalneset! Ein letta gjeng?

Rustikk idyll

Herøygjengen pausar med stil. Bål på eit blunk, og delikatesser i alle variantar kom fram frå pakkposane.

Sommarstemning i havgapet. Stad aller bakerst til venstre.

Sygni med restane av det gamle fyret

Kaos på kaia? Klar for heimtur.

Jan og fuglefjellet

Jason

Siste økt i solnedgangen. Nesten litt vemodig når slike turar tek slutt. Sommarkveldane kan ikkje brukast betre enn dette!  

Kva har eg lært i dag?

• Det går fint å padle i 2 meter dønning, men innimellom vert det i overkant spennande.
• Det går hol i plastkajakkar og
• Det å vere ei større gruppe på tur gjev ny innputt og inspirasjon, men er også utfordrande
• Det er viktig å kunne vurdere eigne grenser og ferdigheiter - og ta konsekvensen av det

Mange personar frå bloggverda og padleforumet har fått fjes og stemmer i løpet av turen. Det var veldig hyggeleg å treffe nye folk på ein slik tur. Takk til gjengen frå Herøy KK for følget og oppfølginga. 

Fleire bilde frå turen: HKK fotoalbum på FB