Damenes aften på Alnes

 28.09 I "gamle dagar" var vi ofte ute med kajakkane og surfa på stranda på Alnes. Etterkvart har vi utvida horisonten i mange ulike retningar, og vore andre plassar. Det har vore lite sand på stranda, og lite freistande å knuse kajakk mot stein. Eg har kjent på eit lite sakn, for det var mange nydelege timar med adrenalinrush og naturopplevingar her. Brått var sanden tilbake, surfelysta på topp, og nye medpadlarar gira. Små bølger, mykje moro og høge på livet! Det vert nok ikkje så lenge til neste økt! 

Kjempefornøgde!!

Lene, Sygni og Lene (Foto: Sygni)

Når kvelden startar slik veit du at det blir bra!

Blankstille ved moloen, men vi hadde tjuvkikka på stranda - og der trilla det inn vakre små bølger til oss!  

Roger stod på land og filma litt: 

Ikkje så heftig, men artig for kajakk-kvinner!

Bølgene vart gradvis større og dagslyset forsvann, sakte men sikkert. Kveldane no er alt for korte, og det vart mørkt lenge før vi var leie. Men kanskje like greit å gje seg medan leiken er god og før alle kreftene er brukt opp? Fin padling i dønningen rundt Alneset tilbake.  Vi fekk sjå "Alnes by night" stige fram medan vi pakka i hop. 

På heimveg

Skymt i hamna

Vi fekk øvd på av- og påstigning ved brygge, støttetak og kanting, rulle og andre raritetar, styreevne med og utan skeg og eg fekk meg ein salto (!! framlengs). Det aller beste var likevel å leike seg saman med gode venner og å finne tilbake til godkjensla på stranda!

Alnes

26.07 Kjekk dagen derpå-økt på Alnes. Eg hadde ikkje med kamera, men Øystein hadde.... Store forhold på tuppen, fine bølgjer med veldig mange brettsurferar på stranda, og fin lita bølgje på innsida. Vart nokre fine kontrollerte surfar, og eit par litt mindre kontrollerte. Lite fart i surfen og sterkt sideveis drag i sjøen var utfordrande nok. Herleg økt!

Ups. Litt bakpå. Hakket før eg rulla, men det vart ein grei dunk før vi sklei forbi kvarandre. 

Foto: Øystein Pilskog/Kajakkguiden

Rundt Lesten

15.04 Impulstur til Alnes! Eg jaktar på dei perfekte forholda, og nyttar høvet så ofte som mogleg. Det var maks fjøre då vi kom, og ekstremt steinete. Flotte bølger, eigentleg ganskre passelege, men dei enda i ein skikkeleg dump inn mot stranda og steinane. Det var difor grunn til å vere litt skeptisk. Etter litt om og men vart det turpadling rundt Lesten i skarpe vårfargar og seig dønning. Påskestemninga slo mot oss frå både hav og land. ...og jakta på dei optimale forholda held fram....

Alnes

Lesten

Kvitt på toppane både på fjellet og sjøen! 

Høg ørneaktivitet og dels lågtflygande! 

6 km t/r

Søndagssurf

17.02 Rekordmange på Alnes på leit etter surf. Det var i periodar gode forhold, og det vart mange fine surfar på alle saman. Då er det gøy! Vi var var og veldig disiplinerte og flinke med å plassere oss og ta omsyn denne dagen. Då vert både humøret og HMS'en på topp! Flott lys utover ettermiddagen, og vi måtte stoppe opp og sjå litt ekstra. Det er jammen flotte rammer kring hobbyen vår. Vi er heldige.

Alnes

Vakkert! 

Det vert nokre kilometer... 13, 6 ut i frå Endomondoen der over halvparten av dei var lagt att i den "snurren" her

Link til Øystein sin video fra surf 

Snøbygesurf

3. februar Tunge snøfiller dalte ned. Dårleg sikt og dårleg brøyta. Oppvarming med snømåking i tørrdrakta. Kajakken full av snø etter ei natt på biltaket. Det er berre spesielt interesserte som fer ut på surf på slike dagar. Altså oss. Etter opplevinga dagen før så håpte vi på surf med spekkhoggar - og var einige om at eventuell kval trumfa surf.

Liknar på vinterpadling

Alnes i vinterdrakt. 

Februarrulle inne i hamna - sjekk. Vi måtte utom for å finne bølgjer. Roger starta med ein supersurf. Deretter var det rotete mønster og vanskeleg å fange surf. Vi for inn på stranda og prøvde oss litt der og, men det var ikkje særleg bra der heller. Sjøen fall, og vi venta at det vart betre forhold utover dagen. Då vi tok lunsj var sjølvtillita låg. Eg hadde ikkje klart å fange meir enn eit par surfar heile føremiddagen.

Innpakka i fjellduken, med varm lunsj i magen, var det freistande å berre gje seg for dagen. Frode finta meg ut med ei lissepasning (i overført betydning), og brått var eg på veg utover att. Noko som eg i ettertid er veldig glad for! Del 2 vart nemleg både lysfest og surfefest! Det var perfekte forhold der ei stund og den låge vintersola og bygene spelte kvarandre opp til eit dramatisk himmelshow. 

Utover for økt nummer to for dagen. Lysfest i startgropa. 

Hammertime!

Jaggu kom han seg med - P&H Delphin 

Lekkert i pastell! 

Masse flotte surfar, høg på livet, ny sjølvtillit. FOR EIN DAG! Ingen kval, men det gjorde ikkje det slag. Kolonnene i tunellen går oftare og det opnar for meir leik utover våren.

I rein distansepadling: ca 6,5 km. Med surfinga? Truleg det dobbelte. 

Vintersurf med kajakkpremiere

26.01 Det har gått inflasjon i surfekajakkar på Valderøya dei siste vekene og fleire har oppgradert kajakkparken monaleg. Med nøgde og velutstyrte karar vart det surfelaurdag på Alnes. Vinterleg lys, men ikkje så kaldt. Dønning frå vest. Nesten ingenting på stranda, men bølga på utsida gjekk kvitt.

Dei tre musketerane på veg utover

Første turen i ny kajakk! Det såg ut til å fungere rimeleg greit, ut i frå både surfinga og gliset. 

P&H Delphin 155 (t.v) og 150 (t.h). 

Det ser ikkje ut som det er så stor skilnad på papiret, men det er verkeleg ein skilnad på storleik som utgjer mykje!!!

Alnes er flott i vinterdrakt!

Litt på etterskot, kan dette gå då? Nope. Bølgja - Frode 1-0

No kjem det seriebilde frå ein og same surf: 

Denne vert bra!

Padle på!

I surfen! Yess!!

HAMMERTIME! 

Imponerande å sjå full kontroll med berre kanting! Har ikkje åra i vatnet eingong. Rått!!

Bølgja - Frode 1-1

Delphinane

Fint å berre vere ute i dag. Det vart ikkje noko særleg med surf på meg og Nukaen, nokre få halvhjarta. Enten for stort eller for lite. Eg hadde ikkje mentalt overskot til å prøve meg på dei store. Har respekt for tonnevis med vatn. Det vart i alle fall tatt ei rulle.  

-

Så får eg no høyre det, då vi lempar opp på bilane etterpå; - Du skal ikkje ha deg ein skikkeleg surfekajakk då? Inntil vidare trur eg plan A er å jobbe med psyken og ferdigheitene. Men eg har ståande tilbod om å prøve desse skikkelege surfekajakkane - så kven veit? 

5 km distanse + surfinga

Surfesøndag med ny brottåre

19.08  Laurdag kom åra i posten: Stikine med tynt skaft og 1,90 lengde. No skal eg teste om kort åre er tingen i surf og brott. Hypotesa så langt er: kortare åre, større padleglede! Heldigvis tikka det inn melding om kvelden: Padling?

Nyåra!!!

Kolonne til Godøya. Då rekk ein å reflektere kor heldig ein er: Stort sett kan eg fare kor eg vil når eg vil, og eg har padlevennar som dreg meg ut på gråversdagar! 

Øystein i farta

Jason i farta! - rett frå ferie med masse energi!

Slik ser det altså ut frå land

Det var skikkeleg vanskeleg å fange surf denne dagen. Ein del vind og eit absolutt krav om presisjon for å vere i posisjon til surf var krevjande. Etter nokre timar var eg veldig sliten. Ny-åra bestod med glans, og eg gledar meg til å prøve den på strandsurf! Perfekt lengde og jammen var ho var rullbar på begge sider.

 

Kenneth demonstrerar perfekt timing!