Høgsvora (1163 moh)

4. september. Målet om alle Telltur-kodane til Ålesund og omegn friluftsråd begynner å verte hårete. Det er litt for mykje reising, padling og andre aktivitetar. No har eg i grunn forbant meg på at eg skal gjere eit forsøk, så september vert knallhard turgåing kvar ein ledig ettermiddag. Onsdag var ein nydeleg seinsommardag. Eg for rett til Vaksvikfjellet etter jobb, med Høgsvora i blikket.

Godt skilta og herleg agrikulturelt i Ørskog

Eg fekk litt panikk ved skiltet. Trudde det var omlag to timar opp, og det var nøye kalkulert mot resterande timar dagslys. Rett nok hadde eg hovudlykt i sekken, men lysta til å vase nedatt åleine i mørkret var minimal. 

Lettgått terreng. Fin og tydleg sti. Stien følgjer ryggen heile vegen oppover, ope og fritt, men ikkje luftig. 

Toppvarden. Som vardar flest, og som vanleg eit kjærkome syn. 

Siste 100 høgdemetrane var ur. Eg møtte ein triveleg fjellvant lokal kar på veg ned. - Det ligg ei bok for sunnmøringar og ei for romsdalingar i varden, forklarte han velvillig. Eg var litt usikker på kva bok romsdalingar busett på Sunnmøre skulle skrive i, så eg nøyde meg med å fotografere Telltur-koden. Slik er det å bevege seg på fogderigrensa. Tullar ikkje med slikt. 

Mot nabotoppen Steingardstinden. 

Eg hadde eigentleg tenkt meg bortom Steingardtinden og. Iskald vind på toppen og grov laus ur gjorde at eg trekte meg på den - for denne gongen. Brukte ca 1,5 time opp, så hadde faktisk rikeleg med dagslys å gå på. 

Jammen var det ikkje ein nabotopp på nordaustsida og. Eg trur alle desse fjella vert kalla Næremstindane frå Tresfjordsida. 

Lauparen har vi vore på tidlegare i sommar - den er flott frå denne vinkelen og!

Ryggen nedover att. Flott utsikt til Romsdalsfjell og Sunnmørsalpar på alle kantar.

Perfekte badekulpar!

Det var omlag 20 grader denne ettermiddag, så det freista med eit bad i bekken. Dessverre var det store skilt med "Drikkevatn - bading forbode" her. Perfekte badekulpar på rekke og rad nedover. 

Høgsvora er eit mykje nytta skifjell. Eg skal ikkje på ski på den ryggen der, det er i alle fall sikkert. Fotturen kan eg anbefale - lett 1000-metring med fin utsikt!  

Link til vinterturar på Høgsvora på fjellinordvest.net