Firarbande på tokt til Langholmen

11.04. Gamle og nye venner, gamle og nye kunstar. Teknikk er ferskvare og læring gjer vi heile tida. Vi tok ein damenes aften for å leite etter snill surf. Vel. Snillare enn dette skal ein leite lenge etter. Det vi fanga mest av var magisk lys og solkula i havet.

4 x 4 = 44?

Ein fotograf på stranda var interessert i å nytte oss som fotomodellar, og det måtte vi no stille opp på! Eg er spent på å sjå dei svart/kvitt bilda som han tok av speglinga og oss knallkule padledamer.  

Flåten; Nuka, Nuka, Epsilon, Play.  

Sandbotn og sydenstemning! Vasstemperaturen litt meir arktisk, og det heldt med 2 ruller. 

Her er ein av leikeplassane våre. Så flatt hav som her er ekstremt sjeldan! 

Det går ikkje an å verte skuffa over manglande sjø på slike kveldar - det kjem nok dagar for surf seinare! 

Vi sette kursen utover mot Langholmen, horisonten og solnedgangen.   

Sygni - nyrulla med ny kajakk - og berre litt kald på fingrane! 

Torunn med ny kajakk - dei kler kvarandre godt! 

Lene H - nysurfa og hekta? Ho traff perfekt på den einaste bølga vi fann denne dagen

Vi fann eit brott på utsida av Langholmen der det var litt "action" så eg fekk leika meg litt. Kvelden rann ut og det var tid for solnedgang. Den vart nydeleg - med klåre sterke fargar og kula i havet. Ikkje eit vindpust, og ikkje ein lyd.   

  

Der var sola vekke, og nymånen fekk stafettpinnen vidare

Blåtimepadling med straum og bølgjer i ryggen heimover. Like nydeleg som solnedgangen. 

Ein perfekt kveld vart avslutta med redningsøving og balansekunst inne ved stranda. Redningane satt, men balanseringa kan eg godt øve meir på! Eg gler meg til firarbanden etterkvart finn surf...!!

Takk for turen! :) 

Link til Sygni sin blogg/bilder frå kvelden

 8 km t/r

Visit Ålesund - bypadling

2.04. Vårkløa har sett seg, og eg vil UT! Denne ettermiddagen rakk eg akkurat å slenge meg med gutane på padling. Vindstille og grått verlag, men med lange lyse kveldar no etter klokkestillinga til sommartid. Målet var bypadling. Jammen lenge sidan sist! Eg gløymer at vi bur tett på ein padlevennleg og flott by, og at det er mykje å sjå på langs vegen.

Padling frå Knuteneset rett nedom der eg bur. Luksus! 

Stø kurs mot Olsskjeret. I dag skal vi i land! For første gong for min del. 

Det næraste vi kjem friheitsgudinna i Ålesund? 

(Eg vart teken av høgdeskrekken og heldt meg på bakken)

 

Innpadlinga til Ålebyen

Kva er det her??? 

Det viste seg å vere Norwegian Travel Workshop i byen, med masse folk frå inn- og utland. I tillegg til flotte bokstavar på moloen var det hornmusikk i gatene og vi vart behørig fotograferte av utlendingane. Skulle nesten fakturert Innovasjon Norge for turen...

 

Det er nett det vi held på med - besøker byen! 

Blankt og vakkert i Brosundet

Jugendstil - eit godt bakteppe for kulørt plast og fargesterk gore-tex

Under brua var det fine korallar. Iskaldt å stikke handa ned for å ta bilde, men fine å sjå på! 

(Dødningehand er mjuke korallar. Vanleg i Norge nord til ca Trondheimsfjorden. Likar seg der det er mykje straum, finst frå 1 - 100 meter djupt og kan verte 20-50 år gamle!)

Ein grå dag vart til innhaldsrik bypadling og etterkvart flott kveldslys. 

Padling tur/retur ca 9 km (?)

Silkepadling til Alnesraunen

5.04 Brått kom våren - og ei vermelding med både sol og vindstille! Padlegjengen på øyane veit å nytte høvet, og det vart planlagt for Alnesraunen - i ikkje mindre enn to puljer denne fredagen!

Varmande sol og vindstille får fram glisa 

Glitrande hav med turmålet som ein bitteliten skugge i horisonten. 

Det er så grunt utover at vi stort sett såg i botnen og i tareskogen. Fleire kilometer frå land stikk det opp ein og anna taretusten. Det er minimalt med båtar her, av god grunn. Fasinerande å padle så ope og eksponert, men likevel i så grunt farvatn!

Austgåande pulje (dei med mest fleksitid på kontoen) møtar vestgåande (natteranglarane)!

Kjekt med samling midtfjords i glitrehav 

Vi må vidare, og det er ikkje feil å padle utover i dette. Det vart etterkvart heilt vindstille og havet la seg som fløyel rundt oss. 

Raunen framleis langt der ute

Vi nærmar oss!  

Smertefritt å komme seg i land denne dagen 

Topptur - 15 meter over havet! Roger førstemann opp.

Torunn fekk knipsa meg på toppen: Glad padledame i kveldssol! 

Panorama

Pause, niste, drodling, filming. Magisk å vere her ute. Raunen er ei klippe i havet. Ikkje så blankskurt som ein skulle tru. Opprevne berg som held stand mot storhavet. 

Vi måtte skunde oss for å få med oss solnedgangen frå kajakkane ute på havet. 

Knapptang! Lene H. lærer oss eitkvart nytt om tang og tare på kvar tur! 

Vi kom oss greit på sjøen att også! 

Det var duka for pastellfest, med det same vi kom oss på sjøen! Sola gjekk i havet som ei glødande eldkule. Vakkert. 

Lene H

Ingvild

Avskjed med Alnesraunen for denne gong. 

Hovudet fullt av inntrykk, kameraet tomt for straum. Det vart ei aldeles magisk padling innover att i blåtimen på silkeføre! Floa dytta oss i ryggen og det var ikkje ei krusning på havet. Ei og anna havsule for forbi. Ein fin gjeng, småsnakk og eit lys rundt oss som ikkje kan beskrivast.  

Torunn testa ny kajakk for første gong, og det gjekk heilt strålande. Øystein testa nydrona og lagde ein veldig bra filmsnutt frå turen - link her.  

Tur/retur 14,5 km

Eksponert! Ikkje kvardagskost å dra hit ut.