Leirvassbu - Skogadalsbøen

19.-20. mars. Avspasering og øyremerkt helg. Kristin og eg ville ha ein skikkeleg skitur og husmorferie. Vi hadde planane A, B og C klare - og bestemte oss etter vermeldinga. Vi la oss på hjul etter "Vassendgutane" mot Lom med vindusspussarane på full guffe og godt mot. Første stopp var uansett bakeriet!

This weekend was reserved long ago for skiing in Jotunheimen. Around easter the routes are staked and the logdes are staffed, serving breakfast and a 3-course dinner. In grey weather we went from Leirvassbu to Skogadalsbøen. Both really nice lodges. The solar eclipse was stunning. It cleared up in the afternoon so we got a glimpse of the steep mountains and spektacular valleys.     

Grunnkurs i skismøring

Vi parkerte på Geitsetra, og gjekk innover mot Leirvassbu. Det viste seg etterkvart at vi kunne køyrt fleire kilometer til. 

Innover Leirdalen

Leirvassbu i sikte! Heilt greit!

Vi kom på opningsdagen og vertskapet grov framleis fram hytta. 

Liten tur - god appetitt! Deilig middag, og triveleg på hytta. 

Fredag morgon. Grått og inga utsikt til Kyrkja. God frukost. Klar for tur. 

Morgonstund har gull i munn og vi er klar for tur! (Foto: Kristin)

På husmorferie er det greit med stikka løyper og skilting. Dei første timane var det flatt lys og inga utsikt, men greit føre. 

Sola kikka fram, slik at vi fekk med oss solførmørkinga. Dette trur eg er ein av  Rauddalstindane (2059 moh).  

Vi har sakene på stell. Perfekt plassering, gløtt i skydekket, vindsekk og solformørkingsbriller. 

Det var kult å sjå, men ikkje så lett å ta bilde av. Det vart skymt og merkeleg grått lys, før månen fekk passere og vi fekk morgongry numer to for dagen. Det vart skikkeleg grått og vi gjekk og vi gjekk. 

Skulle det ikkje vere 14 km? Merkeleg kor langt det var. Vi såg begge ned dalen og fekk hakeslepp då stikkene gjekk rett opp på ein åsrygg i motsatt retning. Oppoverbakke?? NO???? På toppen av åsen prata vi med dei to einaste personane vi møtte i løpet av dagen. To gutar (fri frå friluftslinjeskule) som var på 20-dagars tur frå Bismo til Hallingskeid. Sprekt, med digre pulkar og to par ski. Det er ungdommen sin det. 

Neste etappe viste seg å være urørt pudder og ingen stikker. Heldigvis letta det litt opp, og vi fekk konturane av eit vakkert landskap og ville dalar. Endeleg skulle vi NED dalen! 

Inn i urørt pudderland. 

Finare og finare! Stølshus i Guridalen.

Vi var i rett dal, og vi såg for oss enkel staking i slak nedoverbakke til Skogadalsbøen. Det vart banning og sverting på bakglatte ski i over tre kilometer gjennom tett bjørkeskog i staden. Ikkje mindre stas å sige inn på tunet av den grunn! Skogadalsbøen var ein herleg plass! Hit vil eg tilbake!

  

Skogadalsbøen

Sjølvtillita steig nokre hakk då vi fann ut at vi hadde gått 22 km i staden for 14...

Verdas navle? Opningsdag, triveleg vertskap, påskepynta hytte. Vi tok restane av nista, dusj og seig saman i stova. Triveleg plass, trivelege folk og god mat. Kystverket, Kartverket og diverse konsulentar i god blanding. Husmorferie er gode greier. Fjellfolk er fine folk. 

Kveld på Skogadalsbøen

Link til info om Skogadalsbøen Turisthytte - som du og finn på Facebook.

Link til dag 3 og 4 av turen

Borgundfjordfiske med kajakk

18.03 Kvar seinvinter og tidleg vår er Borgundfjorden full av småbåtar. Det er eit tradisjonsrikt fiske etter skrei som kjem inn til kysten akkurat her for å gyte. Eg har i grunn tenkt at det skulle vore artig å prøve seg. Sygni skar igjennom. No fer vi på Borgundfjordfiske med kajakk!

Galskap? Eg har i alle fall gledd meg i dagevis og var opprømt og oppspilt då vi la ut.

The annual cod-fishing of Borgundfjorden has been a tradition for centuries in the Ålesund Region, but not by kayak . This was my first time fishing here, and my second attemt to fish from kayak at all. We were excited and had great fun amongst the local fishermen. No fish - but a really nice experience. A well spent afternoon on the fjord!

- Kor stor fisk vil du ha? Sygni lokkar meg utpå.. (Foto: Sygni)

Førebudde på fangst er vi i alle fall. Nukaen er dimensjonert for 10 liters plastbøtte i framluka. Perfekt løysing for å sleppe å fiskeslo overalt, når vi er to i teamet i alle fall. 

Fiskelagerrom

Ut på fiskefeltet

Sygni er på plass!

Normalt sett oppsøkjer vi ikkje småbåtane. I dag klina vi oss midt inne i mellom gjengen. Desse karane har ekkolodd, og det har ikkje vi.. 

Høg stemning - snøra uti

Då vi såg nabobåten 10 meter unna dra opp ein diger rugg av ein torsk, tippar ca 10-12 kg, bleikna begge to. Det var ikkje berre freistande å handtere eit beist som veg det halve av kajakken. Pulsen steig, og spenninga var stor! Det vart flåte og teamjobbing. Ei stang og ei harpe ute. 

Borgundfjordfisket foregår i fjæresteinane omlag i sentrum av byen. 

Triveleg på fjorden. 

Det var god stemning på fjorden. Lav fart på båtane og det kjentes heilt greit å mingle. Vi fekk gode råd om kor djupt det var og fleire var nyfikne på korleis det var å få fisk i kajakk. Det kunne vi i grunn ikkje svare på, men det er no artig å prate litt likevel. 

Sjarmerande småbåtfiskeliv

Vert det napp?

Feskarvottane frå nord fekk prøve seg i dag. 

Det vart ikkje fisk på oss i dag. Det var i grunn like greit. Fin kveld på fjorden og det freistar å prøve att. No er vi meir førebudde på kva som ventar. 

No er padlesesongen 2015 i gang!

Sløktindane i solnedgang

17.03 Fin kveld. Dei finaste solrike dagane og våren reiv i heile kroppen. Synnøve returnerte frå møtedagar i Oslo. Eg var hanglete, men desperat etter litt frisk luft. Då vart det Godøya.

Hiking and geocaching after work. Great view and amazing sunset from the peaks at Godøya. I just got home in time for the best northern lights in years.

Rett opp frå hamna på Alnes

Johan Skytt steinen ligg framleis godt der oppe.

Det gjekk kjapt frå dagslys til solnedgang

Fin vindstille kveld. Nydeleg lys. Solnedgang i ein heil time med skiftande lys og fasettar. Godt å vere ute. 

Alnes. Surfesesongen er rett rundt hjørnet. 

Denne kvelden var det berre brettsurferar ute. 

Magisk. Eldkule. (Japan Foto?)

På toppen av Storhornet, og vi får med oss eldkula gå i havet. 

Rettare: I skydekket. God "timing" - nok ein gong! 

No legg vi ruta bortom Sløktindane, der eg får med meg ein geocache. 

www.geocaching.com

Sygni ringte og ropte ut - Nordlys! Kom deg ut! NO! Det vart eit magisk punktum på ein flott dag. 

Nordlysshow frå verandaen

Skarsethelg

13.-15 mars Skarsethelg! Herleg helg der vi gjekk frå den eine verandaen til den andre. Bålbrenning, kaffikos, bursdagsfeiring. Søndagen vart brukt til grilling i fjæra i Stavika. No er det vår!

Skarsettinden 

Kvist og kvas. Raudtuva bakerst.  (Foto: Karianne)

Bål i fjæra, med fin utsikt til skipsleia og "Ormen lange" på Gossen. 

Eg runda av helga med eit fjordcruise i verdsklasse over Moldefjorden. Kven seier at infrastruktur og samferdsle ikkje er vakkert?

Artig på Auskjeret (1203 moh)

12.03 Strålande sol og timar til gode - då vert det skitur! Endeleg er dagane lange nok til at det går an å gjere skikkelege sprell etter jobb. Vi var gira på Auskjeret i Sykkylven, og rykta gjekk om fine forhold.

Afternoon skiing in day light for the first time in 2015! We went to Auskjeret (1203 masl) in Sykkylven, ready to randonnée. Conditions varied from easter feeling at the bottom to icecold arctic at the top. Great snow for running -  a hard surface underneath a few centimeters of fresh snow. Big smiles and great fun!

Påskestemning! Sola varmar og bakkane ligg krittkvite framom oss. 

Vi ser heile ruta opp til toppen frå parkeringa. 

Gråare og blindeføre. Det gjer ingenting. Vi er like blide. Gunhild oppdaterar oss på høgdemeterstatus frå ein eller anna app. 

Opp og opp. 

Det er berre å gå på, finne eit greit tempo og kjenne at kroppen fungerar

Kule fargar i aust. Turkis og merkeleg lys der borte.

Gruglede seg til nedkøyringa.

Arktisk ved første varden. Forblåst og iskaldt, her var det berre å få på jakke og hjelm, og sette snuten nedover att.  

Fantastisk vakkert! Vidunderleg lys, flotte fjell. Fridom og meistring. 

Teambilde! (Foto: Gunhild)

Eg har vore her ein gong før, men hadde gløymt kor flott det var. Relativt enkel og trygg tur, under 30 grader heile vegen. Fantastisk utsikt. Flott vinkel til Sunnmørsalpane - 180 grader horisont med dei flottaste fjella i Stranda,Sykkylven, Volda og Ørsta. Eg skamma meg litt. Dette er ein tur og ein topp som vi ofte snakkar litt ned - fordi det går så mykje folk her. - Unnskyld Auskjeret! Det er ikkje mindre flott her av den grunn. 

GPS spor frå turen. 

Det var eit heilt aldeles supert føre. Hard under, styresnø oppå. Ikkje noko særleg vindpåverka, bortsett frå heilt på toppen. Artig å renne, sjølv om eg framleis vert veldig pinglete i dei brattaste partia. Gunhild og Janne susar avgarde, og får det til å sjå enkelt og elegant ut. Det er stor inspirasjon, her er det berre å skaffe seg mengdetrening!

Litt GPS- logg info: 

Totalt 7,8 km og 890 høgdemeter. 

Eg brukte totalt 2 timar og 35 minutt, av dette var 1 time og 59 minutt i bevegelse. 

Snittfart opp: 2,27 km/t.

Snittfart ned: 10,4 km/t, maks fart ned 26 km/t (Det er her eg er interessert i forbetringspotensiale!)