Geita fyr og oktobertelting på Tviberg

Etter ein tapasaften vert det fort rundt lunsjtid før ein kjem seg på sjøen. Vi la ut frå Øyra og det var havblikk!

Nina speglar seg før Sauesundet

Kjente og vakre profilar! Tviberg og Brurastakken. Basecamp var planlagt ved foten av Stauren (spissen i midten)

Først skulle vi padle ein liten omveg, og plukke med oss eit fyr. -Rekk vi det før det vert mørkt? Ja, trudde vi. Dessutan er det ikkje kvar dag ein kan padle ut til Geita fyr med ein svak austatrekk i ryggen og knapt ei rørsle på sjøen.

Før vi kom så langt, var vi svoltne. Då vart det lunsj i Aralden.

Aralden aust og utsikt innover. Rart å sjå landskapet denne vegen.

Aralden er kjent for fin strand, og vi har telta på vestsida før. Vi har ikkje vore på sørsida, og der var det jammen endå fleire fine strender og holmar som vi kunne snirkle innimellom. 

Nina på veg mot Geita fyr.

Det vart litt meir bris, men framleis fint å krysse til fyret. Då eg kom bort sat Nina i kajakken og bante. -Her må ein no VERE GEIT for å komme opp! Vi gjev ikkje opp så lett, og var førebudde på at det var litt kronglete å komme i land. Etter ei kort risikovurdering av bad i tareskogen lot vi stil vere stil og velta vi oss bokstavleg talt i land. Ingen bading, og det var vel like greit. 

Jubel på Geita!

Vi har hatt lyst hit lenge, så det var god stemning på fyret. Nytt fyr på lista. Det var ein flokk geiter som gjekk her og, så alt var som det skulle. 

Fyrturist Nina.

På fyret funderte vi litt over kor kort det eigentleg var over til Solund. Neste gong? På veg ned til kajakkane traff vi to skjønne småjenter. På kaia var det heldigvis nokre foreldre og. Det viste seg å vere dei som nyleg har teke på seg å få liv i fyrmeisterbustaden att. Kanskje det på sikt vert mogleg å leige?

Artig med eit treff her ute i havgapet, og på bloggen til Sirpa kan du følgje deira fyreventyr på Geita.    

Heldivis låg kajakkane på same plass som vi forlet dei.

Siste etappe før basecamp. Geita - Tviberg. Ikkje nok med at det begynte å skumre, den fine austatrekken vi hadde hatt i ryggen heile dagen forvandla seg til ein litt friskare nordavindsvariant rett i fleisen.

På Tviberg stod hjorten og tok i mot oss. Vi rakk det akkurat før det vart mørkt.

Basecamp i sikte - Tviberg aust.

Kaldt, mørkt og oktober. Det gjev ein viss motivasjon til å vere effektiv i val av leirplass, teltoppsett og middagsmat.

Ahhhh.....!

Drivved er ein fin ting. Det er og veldig greit å reise på tur med nokon som har laga hjortegryte på førehand! Det kjentes ut som verdas beste hjortegryte faktisk. Vi hadde med bøker og teltlykt og trudde vi kom til å hutre i teltet fram mot leggetid. Men det var så triveleg på Tviberg, at vi vart sittande ute og nyte kvelden. Det var litt overskya, så det vart verken kaldare eller råare. Oktobertelting er undervurdert! Vi var og veldig nøgd med oss sjølve, både padlemessig, bålmessig og sånn reint generelt.

Soloppgang

Etter ei meget komfortabel natt i telt, der vi traff 100% med både underlag og påkledning, vakna vi til ein nydeleg soloppgang. Og kuling. I alle fall nesten. 10 m/s i alle fall.  

Basecamp Tviberg

I staden for å bekymre oss for vinden, (det var uansett padlbart) så gjekk vi på sightseeing. Tviberg har to gardar og masse historie frå tidlegare tider. Kulturlandskapet er veldig fint. Framtid og forfall er truleg ei utfordring... Etter fleire turar hit ut er heile øya eit favoritturmål for meg.  

Med ein gong vi begynte å bevege oss så kom ørna og sjekka.

Eg er sikker på at det var same ørna vi såg frå Stauren tidlegare i sommar. No er vi altså på førnamn med både Aldenørna og Tvibergørna.

Tuna på Tviberg

Kilometer på kilometer med steingard på over meteren held innmark frå utmark.

Kva har dette vore?

Klokka går, sjølv om ein har det kjekt. Lunsj, pakking og heimveg. I motvind. Jamn, solid tung motvind. Eg fekk kjempevondt i skuldra og bytta frå euroåre til grønnlandsåre ved Brurastakken. Det gjekk heldigvis betre. Vi brukte 1,5 time til Nærvika!

Naustrekka i Nærvika (eller Nervikja?)

Vi har eigentleg ikkje lagt merke til så mykje meir enn båthotellet på Vilnes, før Marit blogga om naustrekka innafor. Så det vart dagens sightseeing. Fine naust, og ein god dose forbannelse over motvinden, som det stod heilt klart for oss at ville vare dei neste timane og.  

Dagens drama

Litt drama på veg heim. Vi skremmer ein sel, og brått ser vi noko kvitt som flyt. Det viser seg å vere ein fin fisk. Brått dukkar verdas største oter fram og tør akkurat så vidt ikkje ta den. Selen følgjer med på trygg avstand. Ein slunken måse kryssar gong på gong, frustrert over storleiken på byttet og desse padlarane då!

Resten av turen var knallhard jobbing i motvind. Knallhard. Demotiverande. Heilt til Sauesundet. Heldigvis var det litt meir folkeleg "normal" motvind i Granesundet.

Sjarmøretappa til Askvoll sentrum

Klokka gjekk. Det som skulle vere god tid vart travelt. 18.00 landa vi på Øyra. 19.00 var vi på plass i samfunnshuset på Zumba (Nina er instruktør så ho må jo stille..).

Kart over turen (klikk for større)

Dag 1: 27 km padling - 4,5 timar effektiv padletid

Dag 2: 17 km padling - 4 timar effektiv padletid. Motvind ja.

Seier det igjen: Oktobertelting er undervurdert! (og det var austavinden og...)

.. og premien er..Ulla fyr!

29.05 Kristi himmelfartsdag. Ein kjærkommen fridag i mai, som denne gongen varta opp med full sommar. Det kjentes nesten ut som eg hadde vunne i lotto, då vi møttast i sentrum og leste opp kajakkane på båt. Nye padlevennar, nytt padleområde og ein heil og ubrukt dag.

Ragnhild på soldekket (eller kva det no heiter). Herleg å vere turist i eigen by!

Til kvardags er dette utsikta frå kontorvindauget mitt - men den er minst like flott frå båt ut Moljegapet på ein fridag! 

Framme på Skuløya/Flemsøya, og vi ser over mot Ulla bygd og Ulla fyr. 

Vi held oss inne med lokalbefolkninga som best vi kan. 

I kajakkane - og Ulla fyr er innan rekkevidde. 

Først ville vi sjekke vestsida av Skuløya både for å sjå "nytt land" og vurdere moglege surf/leikeområde. Denne dagen var det minimal dønning og lite vind. Så å stille inn hovudet på rekognosering var fint. 

Flott monument på Flemsøya/Skuløya. Eg lurte på kva og kvifor. 

Ved sjøkanten på ytste Flem ligg Geitevarden. Før 2. verdskrig stod ein varde/innseglingsmerke på berget Geita ytst på Flem. Denne vart riven under krigen.Ei engelsk mine på sokkel vart reist i staden. I dag er den eit minne om kampen mot tyskarane i tillegg til at ho fungerer som godt sjømerke for båtfolk (www.haram.kommune.no)

Ragnhild i farta

Plastkajakkane sjekka dei trongaste passasjane

Lekkert i Kvalvika/Sandvika. 

- Betre enn Nord-Norge! påstår Ragnhild. Som "berre" har teke med ein mandelbotn og litt jordbær til oss.   

Sommarstemning!

Vi for tilbake samme veg, og sjekka båten. Klar for runde to på oppdagingsferda!

Store grunne område innanfor moloen. Turkis og krystallklart.

Karl-Johan i farta. Breie glis prega igrunn heile gjengen gjennom dagen. 

Bak oss var det sol og turkis sjø, framom oss velta grå havskodde innover Haramsøya. Fasinerande. Her hadde vi moglegheit til å padle langs land tilbake, så det var ikkje direkte farleg. Eg var likevel litt spent på kor fort og kor tjukk skodda kom til å verte. 

Skodde over Ulla

Frå sol til grått. Vi padla inn i skodda med freidig mot.

Ulla fyr. I alle fall innan rekkevidde no!

På veg opp mot fyret

Vi står i skodda, medan Ulla bygd er bada i sol. 

Dårlegare utsikt mot vest i dag..

Ulla fyr er "landfast" med Haramsøya, og det går an å komme seg hit med både bil og sykkel. 

Fyrturistar på Ulla fyr

Vi kom oss i kajakkane att, og for på yttersida. Det fjøra og det braut litt på revet. Det var berre uryddig småbryting, men det revet har potensiale på dei rette forholda. Vanskeleg å seie kva som er optimalt - men gammal dønning frå hovedsak vest bør sjekkast ut. Her er det nok mange dagar i året med FOR mykje ver til at det er triveleg å vere uti med kajakk. 

På yttersida. 

Fin medsjø innover att, og det var mykje trivelegerare å padle frå skodde til sol enn omvendt. 

Skodde på Haramsøya. Vannvittig stilig, må opplevast. 

Inne på grunna vart det litt leik og moro. Kanting og slikt. - Eg tek alle oppspel til leik dønn seriøst, fortel Christian. Heldigvis! Christian imponerte stort med å stå i kajakken over mange hundre meter. Karl-Johan imponerte med ferske og gode rulleferdigheiter. 

Christian er konge i kajakk, sjølv om Ragnhild truar med fantefakter. 

Ettermiddag og ankomst Indre Flemsvika. Ein fantastisk padledag går mot slutten. 

Kart

Turen vart omlag 18 km utan at DET var det viktigaste denne dagen. 

Då eg kom heim hadde eg framleis kjensla av å vinne i Lotto! Herlege folk og flott tur! Takk for ein super padledag!

Dei som vil oppleve Sunnmøre med båt/kajakk kan til dømes ta kontakt med 62 Grader Nord. 

Fyrmeisterbustaden på Ulla kan leigast, sjekk heimeside for Ulla fyr

Eg har vore her tidlegare med sykkel - som og fungerte ypperleg! Link til øyhopping med sykkel.

Prosjekt telting - oppsummering

Kajakken åpnar nye dører. Brått er det ikkje vanskeleg å få med seg utstyr til ein overnattingstur. Vi hadde vore på nokre turar då Nina lanserte ideen om "Prosjekt telting" i august 2012. Målet var å ha minimum ei overnatting i telt kvar månad gjennom eit heilt år.

Oppvarmingsteltturar:

2010 - September - Tviberg
Dette var berre ei så kanonfin helg i telt, at vi fekk meirsmak. Padling, fjelltur og bading i nydeleg septembervær. Hurtigruta kom durande forbi på morgonkvisten, hjorten fekk bortimot hjerteinfarkt av oss i lia og Kjell kom padlande ut med kaffi. At det var så heftig vind laurdagen at vi berre såvidt kom oss over til Tviberg har eg nesten gløymt...

Tviberg - vest. Flott teltplass.

2011 - Juni - Aralden (Nina og eg)

Test og gjennomgang før ASKR. Padling og telting i gråvær. Fulle av sjølvtillit! Telting og padling går som ein leik!

2011 - Juli/august - Arctic Sea Kayak Race - ASKR- Lofoten (Nina og eg)
Padletreff med store bokstavar. Dagesvis i telt og på tur. Kjekke folk. Flott natur. Vi var solgt. Eigentleg skulle vi bu på hytte og hotell resten av ferien. Vi telta oss sørover. 14 dagar i kanonvær (stort sett). Hotell i Trondheim vart nedtur. 

ASKR! Gaukværøy. Sommarferie! Padleferie! Vi var hekta. Etter denne morgonen her var vi på telt- og Nord-Norge-køyret.

2012 - Januar. Eg går amok på januarsal. Nytt telt. Exped Orion. Testa på dagstur i Ellingsøyfjorden med Susan. Fantastisk fin vinterpadlesøndag, og hu og hei for eit fint telt!

Eit rom med utsikt.. Sitrande spenning og forventning! Nye teltturar?

2012 - Mai - Flora (Nina og eg)
Magnus og Lars kom sørfrå. Nina og eg hang på. I alle fall eit lite stykke. Kjekt å treffe padlarar frå andre plassar. Kort vart langt nok, og første camp var i Staveneset.
 

 

Teltleir i Staveneset med "Norge-på-langs-nordkaperne"

 

Hoppa av "Norge på langs". Eit rom med utsikt på Tansøy. Frost om natta og 10 m/s nordavind. Iskaldt. Kaldasta natta vi har hatt i telt.  

 

Skorpa. Vi har lært eit og anna om å sette opp telt i livd. Betydeleg varmare, høgare komfortfaktor og betre søvn. Vaknar til knallvær og to døgn med strabasar er gløymt på ein blunk. Sjarmøretappe om Stabben fyr heim. 

 2012 - Juni - Ellingsøyfjorden (Sygni og eg)

Morgonstund ved Ellingsøyfjorden. Klart det freistar med MEIR etter slike dagar. Frukost i t-skjorte..  

Prosjekt telting:

2012 Juli - Alden (Nina og meg)
To dagar telting i Alden. Nydeleg vær. Tur på toppen, rundt Alden, i Håsteinen og på Stauren på Tviberg. Nina imponerar med bålbrenning.

 

Magisk i Alden

 

Her vart prosjekt telting født: 

 - Du, seier Nina. Hmmm, ja? seier eg. - Vi skal ikkje ta å telte gjennom eit heilt år då? Nina gløttar bort på meg. -Sånn til dømes minst ein gong i månaden? 

Eg tykkjer sjølvsagt det er ein aldeles strålande idè - og vi er i gang!

(det var ei lita utfordring at mine augusthelger allereie var brukt opp, men formell start i september gjekk fint!)

2012 September - Selje
Trude, Sygni, Nina og eg. I same telt. To netter. Flott tur, med mykje læring. Historiske Selja, klostervandring og besøk på Ulvesund fyr. Vi får med oss forskjelleg. Læring: Gass held ikke når det vert kaldt, påfølgjande kjøp av bensinbrennar.

 Klosterøya Selja dag 1- Sygni sitt Svalbard -telt.

 Søndagsmorgon på Venøya - dag 2

   
2012 Oktober - Tviberg (Nina og eg)
Tviberg er ei fantastisk øy. Nok ein gong. Turen ut gjekk om Geita fyr. Turen heim var prega av motvind, og vart lang. Men det takla vi.

Oktobermorgon på Tviberg

2012 November - Borgarøya (Nina og eg)
Kort, men lærerik tur. Det vart lang ettermiddag og kaldt. På grunn av at vi budde på eit museum, og at det bles kuling så vart det ikkje tent opp bål. Vi tok ikkje sjansen på å sette heile kajakkmiljøet på Ytre-Søre-Sunnmøre i vanry med å brenne ned ein herregard... Læring: Tresesesongssoveposar dug ikkje om vinteren sjølv med jervenduk. Påfølgjande investering i vintersoveposar på begge deltakarar.  

Herregardstelting i Ulstein

2012 Desember - Hagetelting på Skarset
Desemberteltinga vart kritisk. Både Nina og eg hadde dødsfall i nær familie i adventstida, og friluftsliv var ikkje prioritert. I romjula vart vermeldingane kjempedårlege. Det er NO eller aldri - ut i kvar vår hage - få det unnagjort! Venner, familie og naboar rista på hovudet... Læring: 8"-spikar er svært gode teltpluggar når det er frost, og dei har vore med på tur sidan.

Nina med verandatelting (t.v) og eg på plena på Skarset (t.h)

2013 Januar - Hjørundfjorden (Nina og eg)
Korte dagar og skikkeleg vinter. Vi har lært. Satsar på Hjørundfjorden, med kort padling og potensiell teltplass med rikeleg med ved. Vi endar på Strandabøen, har ein strålande kveld der, og taklar -10 kalde. Monstersoveposen var verdt kvar ei krone! God natts søvn når ein held varmen. Meir læring om kva mat som frys først og sist.  

Barfrost i Hjørundfjorden. Dei som ligg lenge får nyte vintersola!

2013 Februar - Smelvær (Nina og eg)
Nytt raid i Askvoll. Smelværet må "teltast inn". Vi har flaks med været, og treff på den flottaste vinterhelga. Kaldt, klårt, sol og HEILT vindstille. Alt går på skinner. Magiske opplevingar. Solnedgangar og havblikk som er ubeskriveleg. Dette er kanskje den aller flottaste telt-helga til no, etter mi meining. Kjensla av å stå opp i havgapet i februar og tusle rundt i stilongensen ein times tid... Ahhh!

Kjente profilar. Morgonstund i Smelværet.

2013 Mars og april - Solund (Nina og eg)
Ny todagarstelting - og to månader i ein smekk. Det gjeld å rasjonalisere. Teltturtreff ein gong i månaden er veldig ofte, og særleg når ein bur med 5,5 timar køyring i mellom. Solund er eit padleparadis! Vi har mange årstider på turen. Dag ein surfar vi i Sognefjorden og nyt solnedgangen på Hardbakke. Dag 2 er det kuling og vi møter overmakta på Lågøyfjorden. Vi snur og tek dagen og natta i eit skogholt. Godt gjort å finne livd i skogen i Solund i grunn. Neste dag får vi ein nydeleg overfart til Ospa og vidare til Korssundet. Vil ha meir tur i Solund! Meir! Meir!  

Mars-telting i Solund

Apriltelting i Solund

2013 Mai - Herøy (Sygni, Ragnhild, Idar, Sigve)
Mai er ei travel tid, men jammen fekk vi skvisa inn kvar vår telting. Sunnmørsteltinga på årets første tropenatt på Herøy gard. Nina dreiv med andre morsomheiter sør for Stad. Lunsj dag 2 ved Flåvær fyr.

Teltleir på Herøy gard

 
2013 Juni - Skarvatnet (Karianne og eg)
I juni fekk vi det og travelt, og måtte ty til "kvar for oss"-telting. Denne gongen droppa eg kajakken, og for til fots til barndommens rike i Skarvatnet på fisketelttur i lag med søstra mi. Bål, eit eventyrleg "bet" og drøssevis med småaure. Knakande kjekk midtsommarnatt. Aldenteltet har vore lite i bruk etter at Karianne testa det i stormkast på Alden for nokre år sidan. Teltet held vinden ute, men stengene vart aldri meir seg sjølv att.. Teltet fungerar no fint sjølv om formen er noko original.

I Skarvatnet med "Aldenteltet"

 
2013 Juli - Hornindalsrokken, Træna, MSE (Nina og eg)
Juli telta vi mykje. På padletreffet "Midnight Sun Experience" utanfor Tromsø, på Trænafestivalen og på Honndalssætra. Det skal seiast at vi testa ut ei rekke DNT-hytter og, sidan halvparten av feriedagane bestod av +12 grader og nedbørsrekordar..

MSE - Sommarøya

Trænafestivalen! Vårt orange lyspunkt på "stille camp". Imponert over teltet som var like tørt (inni) etter fire døgn med regn og vind. 

Hornindalssætra, klar for Hornindalsrokken neste dag. Kvar dame - sitt telt. 

 
2013 August -  Lille Batalden/Kinn (Nina, Britt, Arinbjørn og eg)
På tide med ei skikkeleg padlehelg att! Florabassenget er stort, padlevennleg, og vi er ikkje ferdige her på ei stund. Nydeleg ver, god mat (Alle andre enn meg lagde mat! Eg køyrer gjerne langt om eg kjem til dekka bord..), nye teltplassar, Ytterøyane fyr. Ferieforlengande herlege augustdagar.

Vestsida av Lille Batalden - utsikt til Ytterøyane fyr. Grei teltplass, men ingen moglegheiter for morgonsol (tre telt på bildet..).

Kinn. Kongeteltplass. Framleis utsikt mot Ytterøyane fyr, solnedgangen OG morgonsol. Framleis tre telt.. 

Oppsummering
"Fanfare" - prosjekt telting er FULLFØRT! Vi har brukt ganske mykje energi på å planlegge turar og å sette av helger dette året. Ofte har vi berre hatt ei mogleg helg i den aktuelle månaden. Stort sett har vi hatt griseflaks med veret. Prosjekt telting er gjennomført, sjølv om vi nokre månader måtte campere kvar for oss.

Kva har vi lært?
Lært og lært? Vi har nok lært mykje, men det glir på ein måte ubemerka inn i ryggraden. Det er stadig NYE utfordringar, nye ting vi ikkje har tenkt på, smartare måtar å gjere ting på.

Nina og eg diskuterte om vi kunne ha ei kåring av turane som til dømes beste, dårlegaste, kaldaste osv. Det klarte vi ikkje. Alle turane har vore ulike, med sine eigne særeigenheiter og høgdepunkt. Det var ingen turar vi ville ha vore forutan, og vi var i grunn ganske nøgd med vala undervegs. Dei fleste områda vil vi tilbake til.

Eg har blitt tryggare på kva det vil seie å telte. Eg har betre kontroll på utstyr, og utfordringar som dukkar opp. Om vinteren er bål og ved viktigare enn plan teltplass. Held ein varmen, har vatn og kokemoglegheiter, då ordnar det meste anna seg. Vi har vel og lært litt om kor mykje lenger tid ting tek når det er kaldt og mørkt. Og kva som frys når. På korte dagar om vinteren REKK ein faktisk ikkje så mykje. Til gjengjeld er sommardagane UENDELEGE!  

Det eg verkeleg har fått oppleve er å finne ei god ro, vere fornøgd og kjenne på at det er godt å vere ute. Det er tilfredsstillande å gjere det enkelt. Det er fantastisk å oppleve blåtimane morgon og kveld, solnedgangar og soloppganger.

Avslutning av prosjektet
Skal vi slutte å telte no???? Det var litt kristestemning hos meg når eg ikkje hadde neste telthelg å sjå fram i mot. Slik var det visst for Nina og. For det var ikkje lenge før vi snakka om telting att.
Vi er einige om å justere litt på konseptet. Frå prosjekt til enkeltturar. Satse på helger der vi har sjanse på minst 2 overnattingar. Ikkje få hjerteinnfarkt om vi hoppar over ein månad. Ikkje trumfe gjennom uansett ver. Prøve å få med fleire på telting.

post-prosjekt - telting i 2013
2013 September - Tåfjordblot (Kristin og eg og Troms havpadleklubb)

Basecamp Tåfjord - inkludert heilgrilling av lam og ein "tøtsj" av nordlys utpå natta (Foto: Kristin Friis)

2013 Oktober - Kvamsøya rundt (Nina og eg)
To netter i telt, besøk på Haugsholmen fyr, og telting på villsauøya Riste. Bra helg. Nytt område. Kald vind natt 2.

Oppmøte fredag kveld og telting i småbåthamna i Sandvika. Laurdag morgon og klar for tur. 

Litt livd for isnande vind bak gamle murar på losmeistergarden på Riste. 

I 2014 er det nye forsett, og nye turar. Skiturar har rykka opp nokre hakk på ønskelista. Skikkeleg vintertelting står for tur. Kanskje det vert prosjekt telting del II i vår? Mentor Therese har lova ei god innføring og eit spark bak om det trengs. Det vert eit spennande år!