Bursdagspadling rundt Lepsøya

11.04 Koronapandemi, påske og bursdag. Grått og litt trist ver. Det kunne hypotetisk ha vore krisestemning. Det var det ikkje, for vi hadde ein plan! Forskriftsmessig lågrisikopadling, i gruppe på fem, med innlagt grilling og dronefilming. Vigrafjorden låg flat. Lepsøya rundt var innan rekkevidde. Våre eigne fargar liva opp i landskapet. Det var ekstra hyggeleg å møtast litt fleire på tur enn eg normalt ser på heimekontoret.

Klare for tur på Roald

  

Vigrafjorden låg flat

Eg var allereie godt nøgd med dagen. Foto Øystein

Lepsøya og Rønstadhellaren. 

Dønning ved "U-båtskjæret" (som eigentleg heiter Ravnen)

Innholmen. Her hadde vi tenkt å gå i land (for første gong). Det var eit yrande liv av sjøfugl; måsar, skarv, teist, ærfugl. Det er generelt lite fugl i området vårt, og dei vi har vil vi ta vare på. Så då sklei vi berre forbi på respektfull avstand, og bestemte oss for å utforske denne holmen til hausten att. 

Beinstrekk i Keila. Her er det som ei naturhamn, og gamle tufter etter fiskarbondeliv. 

Det budde vist folk her ute på 1500 -1700-talet. Ca 1760 vart gardane flytta inn i Hellevika, medan nausta og naturhamna vart brukt vidare til inn på 1900-talet på grunn av kort utror til fiskeplassane. I 2020 er det godt eigna for landing med kajakk og ein liten pause her. Eg sluttar ikkje å undre meg over alle stader der folk har budd og sett moglegheiter for liv og verksemd her i landet. 

Øystein ser nærare på "...dei steinute strender..."

Ulla fyr heilt til venstre på Haramsøya. Det er planlagt industriområde for vindkraft på platået. Nordøyane vert aldri det same om anlegget vert bygd, og det får negative konsekvensar for folk og fugl. Eg er sterkt kritisk til pågåande prosessar rundt vindkraft, og har meldt meg inn i Motvind. Der er det plass til fleire. 

Hellevik fyr - i privat eige

Prestegarden ligg fint til, og kan leigast. 

 

BÅL!!! 

Stigning i programmet. Gliset går heilt rundt. Den første grillpølsa i år smakte fortreffeleg!

Padlelunsj på Kjerstad på Lepsøya. Dronebilde frå Øystein 

Lang pause og god prat før roleg padling heim. Ein strålande dag på sjøen. Medbør og selskap av ei havsule på kryssinga over Vigrafjorden. 

23 kilometer - og heile dagen ute. (Endomondokart frå Roger)

Øyatausene på skitur

4.04 Det er ein flott gjeng med aktive folk på øyene her eg bur. Palmelaurdagen rotta vi damene oss i hop til vår første felles skitur. Korona-tiltaka betyr maks 5 i lag på tur og ein i kvar bil. Rart å møtast utan å kunne gje kvarandre ein klem. Skiløypene frå Brauta var nypreppa, men det var eit merkeleg føre. Gammal kald snø i botnen, vår i lufta og våt nysnø som kom dalande. Skismøring i alle valørar frå blått via lilla til raudt var i bruk, med varierande resultat. Dei som hadde felleski fekk nokre småmisunnelege blikk i oppoverbakkane. Vi fekk 15 minutt med varmande påskesol rett i fleisen då vi åt nistepakka - og det var ein fortreffeleg kjekk dag i godt selskap i skiløypa. Dette kan vi gjere fleire gonger!

Ut på tur! Astri har vore i løypene før.

Idyll ved Tjønnebru

Humøret betre enn festet på skia! Men vi kom oss både opp og rundt! 

Varierte og fine løyper rundt Mevatnet

✔ Påskestemning!  Foto: Torunn

Marsnatt i naturen

21.03 Mars hadde vore ustabil, reint vermessig, og brått slo koronapandemien inn over oss i tillegg. Byger og regn skulle i teorien ha pause frå fredag til laurdag, og vi la i veg med fokus på kortreist. Sula sørside hadde potensiale for hengekøyenatt! Eg hadde sjekka vermeldinga ofte og pakka etter den, og kanskje sett mindre ut av glaset... Snøen lava ned under køyreturen og då vi møttes på parkeringa. Vi var ikkje heilt sikre på kvar stien starta, sjølv om vi hadde gått den i lag før. Så litt surr og rot med tunge sekkar før vi fann ut av det. Skal ikkje undervurdere korte turar!

Og no snur eg historia bak fram. Det var nydeleg å ta morgonkaffien i sola! Ho varma for første gang i år! Vi var på ein flott stad med gammal skog dekt av lav og mose, fjordutsikt og kulturlandskap rundt kvar ein sving.

..og om litt er kaffien klar. Slike morgonar er gull verdt!

Køyene våre: Ticket to the moon og Amok

Storfjorden 

Soloppgang over Storfjorden og Sykkylvsfjell

Kaldt og frosen sludd i køya då sola stod opp

Hengekøyeperspektivet

Vi pakka og la ut etter vermeldinga, og for ein gongs skuld så stemte den ikkje heilt. I staden for opphald kom det sluddbyge etter sluddbyge, den eine med større snøfiller enn den neste.

Det var umogeleg å få fyr på bålet, alt var vått og sluddfillene slokte fyrstikkene etterkvart. 

Bakken vart kvit, og vi fann ikkje ved eller alternative oppfyringsremedier nokon plass.  

Litt laber stemning, så vi pakka saman for å fare heim. I 23-tida stilna det og letta opp. Ein klår stjernehimmel. Mørkeblåtimen. Så vi ombestemte oss ein gong til, gjekk ned att og hang opp køyene. Tarp hadde vi ikkje med, og det kom sjølvsagt sludd og snøklumpar ned frå trea om natta. Hengekøyene fanga det fint opp, meir som ei trakt, og alt la seg som ein smeltevassdam under rumpa. Mykje læring. Men når morgonen blir fin blir frysinga gløymt og stemninga på topp. 

Link til alle "Natt i naturen"-turane våre i 2020

I skitrekk med Sygni

7. mars Sygni og eg klarar oftast å få oss EIN dag i trekk i lag i løpet av sesongen. I år traff vi perfekt med ein finfin dag på Overøye i nye Fjord kommune. Vi var litt spente på formen, men jammen låg ikkje skiteknikken og ulma ein stad langt der inne, og det vart tre kjekke timar i bakken før skrotten sa stopp. Mykje hyggelegare å vere her inne i vårsola i mars enn i romjula og kalde januardagar. Nypreppa og fine løyper og akkurat passeleg med folk. Favorittrekket!

Husmorferie!

Flotte løyper og flott landskap! 

Februarnatt i naturen

19. og 25. februar. Februar var generelt ufyseleg. Vi skjønte at utenatta kom til å verte utfordrande.    - Kva om vi googlar gapahukar? kom det frå Synnøve ein dag. Som sagt så gjort. Med nyvunnen kunnskap for vi på rekognosering, med fleire potensielle turmål i sikte. Blink på Solnør. Sjarmerande plass ved elva. Vi hadde ein plan! 

Solnørelva i februar

Rekognosering

Vått, sludd, og berre halvtriveleg ver. Vi fann stien langs elva og gapahuken. Kul plass. Takk til Skodje JFF for strålande tilrettelegging!  

Det gjekk heilt til 28. februar før vermeldinga var rimeleg att, og no måtte vi ut for å rekke overanttinga! Nysnø og kaldt. Tidleg solnedgang. 

Vakkert! 

Kvelden kunne fort blitt lang, men med bålpanne og godt selskap for tida avgarde. 

Leggetid med både frostrøyk og bålrøyk

Morgonen etter. Det var pinnkaldt i lufta, rimfrost på alt, men vi hadde begge overlevd natta. Synnøve mumla noko om ny sovepose. 

Vakkert morgonlys. Ein liten oter kom oppover i elva for å helse på. 

Rusletusle heimover i skikkeleg vinterwonderland.

Det låg an til ein flott vinterdag, og vi hadde ski i bilen. #alltidberedt! Det vart morgontur i nypreppa fantastiske løyper frå Brauta og rundt Mevatnet. Sol, silkeføre og eit par "Stikk-ut!" ski-postar resulterte i to veldig blide damer. Utover ettermiddagen skya det over, så vi følte vi fekk maksimalt ut av skotårsdagen.  

Link til alle "Natt i naturen"-turane våre i 2020