Artig på Alnes trass rullekatastrofe

17.09 Eg starta med å surfe ned trappa heime på berre ein hæl i fin bakoverlent 45-graders vinkel. Det gjorde grueleg vondt. Slim, gørr og dårleg pustekapasitet gjorde at eg nesten lurte på å halde meg heime. Tanken på kva morsomheiter eg DÅ kunne gå glipp av var verre enn smertene, og eg kom meg ut døra.

Alnes låg i skodda. Vi var tidleg ute - og kom oss på sjøen rett før ein haug med surferar på brett. Det var fine forhold, med lang bølgeperiode og fine sett med passeleg store bølgjer og rolege periodar innimellom.

Det var uoversiktlig med alle surferane og forholda var slik at alle spredte seg ut over heile stranda. Eg fekk ein fin surf, prøvde meg med eit høgt støttetak, og gjekk rundt. Det var ingen støtte i bølgja, og ikkje noko luft i lungene. Ut av båten. Cowboyentring. Det gjekk jo fint det altså, men det var litt irriterande. Ny fin surf, passerar to surferar med fin margin, men opsann der kjem det vist ein kajakk frå andre sida... Halvkontrollert velt, som kanskje ikkje var heilt nødvendig, for eg tvilar på om vi hadde kollidert eigentleg. To forsøk på rulle som ender meg at eg må dra meg ut av båten. Grei kameratredning.

Folksomt. Vi ventar på den same bølgja...

Kontrollert rulle. 

Alnes er ein HEILT grei plass å suse rundt på ein onsdagskveld. Eg har truleg verdas beste padlekompisar. 

Folksomt. Slitsomt. 

Den neste timen var eg ute av båten 5-6 gonger. Nye cowboyentringar. Eg testa kontrollert rulle og kom meg opp, men ikkje søren om eg kom opp ved velt. Heldigvis satt eigenredningane heilt som dei skulle, og eg har igrunn aldri drilla det i surf-sone før. Så aldri så gale..... Eg har ein teori om at når den dårleg lungekapasiteten bidreg til kvelningsassosiasjonar under vatn  så konsentrerar eg meg litt lite om rullinga..

Etterkvart samla surferane seg på eine enden av stranda, og bølgjene på "vår" side var perfekte for kajakkar. Kjempekjekk kveld! Det var vanskeleg å gje seg. Då endar det som vanleg med eit kjempestort sett bølgjer og "sentrifugering" av unge lovande. Eg mista både åre og kajakk for første gong denne kvelden, Rett nok ikkje i velten, men den bølgja som kom bak var sjølvsagt endå større, eg var dårleg posisjonert og ho røska med seg alt eg hadde i hendene. Lite anna å gjere enn å svømme mot land og samle opp litt utstyr undervegs. Jason hanka heldigvis inn kajakken min så den fekk ei kontrollert reise til stranda. Det gjeld å gje seg medan leiken er god, og det er som regel 5 minutt FØR eg faktisk gjev meg.

Oppsummering av kvelden:

+ Mange fine surfar, eg har blitt mykje betre på timing!
+ Mykje bedre styring under surf. Har framleis litt å gå på,  men når eg får til kantinga så svingar eg lett begge vegar på same surf!
+ Gode cowboyentringar i surf-sona
+ Mista ikkje surfegleda sjølv om eg måtte ut av båten alt for mange gonger

- Dårlege støttetak (men betre på slutten)
- Elendig rulling (men satsar på at det er eit forbigåande problem)
- Ikkje vett på å gje seg i tide

Den hardaste skaden og det einaste blåmerket fekk eg i trappa heime...

Fint. Finfint. 

Om forholda: 

Vindstille

Vi kom rett før full flo, og leika på fallande sjø

Bølgjelengde etter surfemeldinga: 12

Bølgjeenergi etter surfemeldinga ca 130