Pinsepadling - overnatting ved Hellisøy fyr

29.-30. mai
Vi starta på hytta til Nina og familien på Bruknappen. Etter å ha padla sund og fjordar kom vi oss ut i ope hav, og det låg an til fyrbesøk!

Hellisøy fyr

Fyret var klart innan rekkevidde. Eit smalt sund skil Hellisøya og fyret frå Fedje.  

Dramatisk å padle inn i skuggane, med seig dønning i sundet. 

Ein ting er å padle ut til eit fyr. Det kan mange klare. Noko heilt anna er å kome seg i land på fyret. 

Fyra vert ofte kalla "kystens katedralar". 

Ugjestmilde festningsverk kan ofte vere ei like passande skildring. 

Ikkje noko innlysande ilandstigning på denne sida heller. 

Vi padla rundt, og det var ikkje sjølvsagt kvar vi skulle gå i land. Ofte kan vi bruke Kystverket si landing for båtar, men sidan vi kom på maks lågvatn så var det vanskeleg å komme til trapper og stiger med kajakk. Fullpakka kajakk for 5 dagar på tur hjelp heller ikkje på smidig ilandstigning. 

Dokumentasjon! Hellisøy fyr og meg på same bilde! 

Vi var inne på tanken å droppe å gå i land på fyret, og finne teltplass på hovedøya. Eit blikk på Fedje vestside og vi skjønte fort at det ikkje bugna av enkle landingar og perfekte teltplassar der heller. Solnedgangen var veldig nær og klokka tikka mot midnatt.   

Flott ver, men drag i sjøen. 

På runde to var vi meir kreative. Vi fann ein stad vi kunne legge kajakkane i taren, tømme dei og bære dei opp på berghyllene tomme. Det er faktisk ganske effektivt. HMS-en med denne metoden er og veldig mykje betre enn å slite og løfte på fullasta kajakk. Vi kompenserar for rå muskelkraft med hjerne og tolmod. 

Landing

Landing - oversiktsbilde

Her var det berre å lage løftelag med ein nede og ein oppe og sjaue sekkane opp på teltplassen. 

Vi rakk det før sola gjekk ned! 

Kveldmat i solnedgang og blåtimevandring til fyret før leggetid. DET kallar eg ferie...! 

Gispande etter luft måtte eg bikke meg ut av teltet (aka drivhuset) grytidleg. Vi starta dagen med slumring og soling. Det var vindstille og kjempevarmt her ute i havgapet. 

  

Hellisøy fyr i sommardrakt! 

Kystverket er ansvarleg for drift av sjølve fyrlyset og vedlikehold av bygningane. Fyret vart etablert i 1855, og det budde folk her fast til 1992. No er det freda. Lokale eldsjeler driv utleige og aktivitetar på eigedommen. Tru meg - dette var ein verkeleg flott plass og verd eit besøk! Kunne tenkt meg eit par dagar her ute sjølv. Nokre av moglegheitene er guida båttur med omvisning, eller å leige fyrbustaden for overnatting. 

Link til historia om og booking av Hellisøy fyr

Hellisøy fyr - på facebook

Fyr nummer ein på turen! 

Vi var allereie godt nøgde med eit nytt fyr på lista. Det er ikkje sjølvsagt å komme seg ut. Det er langt i frå alle fyr vi kan overnatte ved!

Omvendt prosedyre. Havblikk! Klar for T-skjortepadling vest av Fedje. Ikkje kvardagskost. 

Link til Pinsepadling dag 1 Bruknappen - Hellisøy

Pinsepadling dag 1 - Bruknappen - Hellisøy fyr

29. mai
Pinsehelga vart avsett til padling allereie i vinter, og slo til med optimalt padlevær. Nina har leika med tanken å padle frå hytta på Bruknappen og heim til Askvoll i over ti år. Saman har vi utvikla konseptet fyrpadling nokre år - og eg har som livsprosjekt å komme meg ut til alle. Vi slo saman dei mest ambisiøse planane; Bruknappen - Askvoll utaskjærs og via fyra. Vi hadde plan B,C og D i bakhand og Kjell Kristian som stilte som bakkemannskap og skysskar. Alle ekspedisjonar med respekt for seg sjølv har jo støtteapparat. 

Nina og familiehytta på Bruknappen. 

(Like ved Feste kai/Lygra Kirke i gamle Lindås kommune, no Alver kommune)

God stemning og full sommar frå start!! 

Lygra kyrkje. Første etappe gjennom sunda i Lindåsbassenget og lurefjorden. 

Idyll! 

Det vart motvind etterkvart, men vi kom raskt inn i ferie- og langturmodus. Jamn padling, rikeleg med drikke, gode pausar. Om ein gjer alt så lettvint som mogleg, reint energimessig, vert det mykje energi att til å kose seg på turen.   

Pause før Fosenstraumen

Flott bru over Fosenstraumen og faktisk ganske mykje straum! Heldigvis berre eit kort stykke akkurat under brua! 

 Det var mindre vind og straum dess lenger ut vi kom. Vi likar oss generelt betre i havet enn i fjordane. Holmane var ikkje lenger skogkledde, her var det blankskurte berg og fargerik strandflora langs ruta. Dette er jammen ei fin tid!!

Sommarstemning!

Beinstrekk! Og for eit blomehav på den vestlegaste av Jibbesholmane.

Vi var litt leie før beinstrekken og brukte tid på å orientere oss mellom alle holmane. Fleire timar med padling i motvind og motstraum låg bak oss. Skal vi berre finne ein leirplass? Ein strekk i sola med Real turmat og eit faktisk syn av Hellisøy fyr i horisonten gav oss nye krefter og ny motivasjon. Det sit faktisk mest i hovudet.  

Fedjeosen med Sandholmane, Øysteinen og Hesjetå naturreservat (sjøfugl)

Vi skimtar eit fyr!!! Hellisøy fyr. 

Fedjeosen byr på nokre kilometer opa kryssing over ei trafikkert skipslei. Det vart tørrdrakt og fullt fokus. I tillegg til oss var det eit offshoreskip, Kystvakta, Forsvaret og eit par fritidsbåtar på fjorden.

Det er kveld, men midtsommarnatta er framleis ung. Nytt fyr i sikte! 

Vide horisontar, lysfest og svarte siluettar som gøymer land og bygder. Det er magisk å vere på sjøen slike kveldar. Det er nesten ikkje mogleg å beskrive. Tenk at vi kom oss på eit fyr allereie dag ein!! 

Dag 1 vart det akkurat 30 kilometer på vel 6 timar padling.  

Kart kjem 

Link til innlegg om overnattinga ved Hellisøy fyr

Pinsepadling dag 2 - Fedje til Gulen

30. mai
Dag to starta med lang frukost, soling og rusletur på Hellisøy fyr. Vi måtte vidare, og det sa seg sjølv at ruta vidare måtte bli yttersida, vest om Fedje. Havet låg paddeflatt, det var varmt og ikkje eit vindpust.

Farvel til Hellisøy fyr

Fedje vestside

Framleis vest om Fedje 

Signalbygget i bakgrunnen er Fedje sjøtrafikksentral

Sjøtrafikksentralen er ein del av Kystverket. 

Sidan 1992 har dei helde auge med tankskipa til og frå Sture og Mongstad samt overvaka og regulert skipstrafikken til og frå Bergen. Vi hadde og planar om å nytte tenesten deira utpå ettermiddagen.  

Framleis vest om Fedje, på veg inn mot Karlsøysundet

Fedje sentrum! 

Ei skikkeleg triveleg bygd i ei skjerma naturleg hamn nord på øya. Med kyrkje og ferje i sikte satsa vi på at det også fants butikk med sal av is!

I sentrum var det så mykje turistar og ståk at vi grabba isen vår og rygga ut att frå butikken. Dei fastbuande gjorde så godt dei kunne for å følgje opp gjestane, men dei tilreisande oppførte seg omlag som om korona berre var ei øl...   

Idyll på Fedje

Vi skulle ut i opnare farvatn, og tok på meir klede. Neste etappe hadde eit par usikre element. Sola steika og vi snirkla oss gjennom skjergarden nord for Fedje og etterkvart gjennom naturreservatet Innarsøyene. Flott havpadling! 

Første glimt av Holmengrå fyr...

For å gjere ei lang historie kort - vi kom oss dit!!! Her kjem etterkvart eit eige innlegg frå fyret. 

Fyr nummer to på turen! 

og holmen var ikkje mykje grå....!!

Utsikt frå toppen av Holmengrå - ytre del av Fensfjorden. 

Vi såg såvidt Utvær fyr heilt i vest. Fjella i Solund lente seg karakteristisk mot vest, med låge siluettar av øyer og holmar i Gulen framom.  

Etter middag (i bikini!) og rusletur opp til fyret ringte vi sjøtrafikksentralen. Dei kunne informere om skipstrafikken i området, og gje oss oppdatert vervarsel. Bodskapen deira var klar og hyggeleg: Få skip, inga skodde og GOD TUR! 

Dressed for Fensfjorden

Nina har ofte gått over Fensfjorden med småbåt og veit at det kan vere ruskete. Eg har og erfart at det kan vere meir sjø her enn på Sognesjøen. Vi hadde difor stor respekt for neste kryssinga, og tok på tørrdrakt i tilfelle uføresett. Ut i frå veret og oppdatert vermelding kryssa vi langt ute, ca 7 kilometer tvers over, rett frå Holmengrå. 

Drikkepause midtfjords

Farvel til Holmengrå i det fjerne

På full fart inn i tidlegare "Trivselsfylket"

 Gulen er ny padlemark for meg, medan Nina har vore her fleire turar før. Etter lang kryssing var det godt med stein, berg og sund. Det var mykje straum i sunda og vi måtte orientere oss litt kvar vi eigentleg var komne.  

Målet for dagen var å krysse Fensfjorden. Vi  var på ein måte ferdige med oppgåva og datt litt saman. Vi var ubesluttsomme og det var ikkje mange innlysande teltplassar. Vi runda holme etter holme. Brått såg vi rett inn til Byrkenesøy. Gulen er ikkje så stort, her ute. 

Kvelden senka seg

Månen var med

Nydeleg solnedgang. 

Vi hadde framleis ikkje funne leirplass. Det var ein nydeleg stille kveld på sjøen med speglande sjø og vakkert lys. Då sola gjekk ned var vi leie og trøtte, sjølv om sommarnatta framleis var magisk. Vi vart einige om at på denne øya her MÅ det berre bli camp.  

Vi fann tang å dra opp kajakkane på, lyng å sette teltet i og slik vart det. Nokre villsauar sjekka oss opp då vi kom, så vi skjønte at maten måtte gøymast godt over natta. Etter ein fantastisk dag med mange inntrykk sovna eg allereie på veg inn i posen. 

Sauebesøk i campen (Foto: Nina)

Dag 2 - blå linje  - temmeleg nøyaktig 30 kilometer. 6,5 time padling. 

Dag 1 - raud linje - temmeleg nøyaktig 30 kilometer

Link til dag 1 - Bruknappen - Hellisøy fyr

Link til overnatting ved Hellisøy fyr