mandag 22. juli 2013

Midnight Sun Experience 2013

Midnight Sun Experience (MSE) er eit padletreff på Sommarøya utanfor Tromsø. Padleentusiastane "Stormgjengen" står bak. Stormgjengen sitt motto er: Fjorden er brei nok for alle. Padling er bålkos, rå natur og sosialt! Det er vel forklaring god nok på kvifor vi køyrer 1700 km (ein veg) for å vere med på det.

Basen på plass - gangavstand til leirbålet (t.v.). Julitelting i boks!

Første kvelden - sosialt frå starten. Kajakkparken er imponerande. Sommarøya er kjempefin og det klør i padlefingrane.

Nina og eg melder oss på Offshoregruppa. Det betyr at vi brukar heile dagane på å ligge langt ute i havet og padle langt. Endå vi eigentleg er på jakt etter snirkling og kosepadling. Meir om turane med Offshoregruppa her:

Dag tre var det eit heilt anna opplegg. Padlegjengen vart delt i tilfeldige grupper. Gruppene fekk kart og starttid frå stranda. På stranda fekk vi beskjed om første post. Vi måtte samarbeide som gruppe, padle til ulike postar og gjere ulike oppgåver. På kvar post var det ein eller fleire personar som gav oss oppgåvene og stad for neste post. Alle oppgåvene var padlerelaterte og opplegget var kanonbra! Dette har eg lyst til å "stjele" med meg både til Sunnmøre og Askvoll. Kan lett gjennomførast noko liknande både i Ulsteinfjorden og Bulandet. Terningkast 6 for idè og gjennomføring! No skal eg ikkje avsløre alle oppgåvene, men vi var innom redning, tauing, fyring, navigering og søk. Og for ei trening i gruppedynamikk!

På jakt etter neste post...

Kart frå Kristin over rebusløypa. 
Vips hadde vi padla 9 km og Sommarøya rundt. Det var minst like fin padling her inne som på "offshoreturane"!

Etter rebusen var det demonstrasjon av redning med redningsskøyta inne i hamna:

Frivillig hopp i havet

Det var vist lurt å legge seg i lenke.

Redningsskøyta lurte deltakarane litt. Då dei var passeleg kalde og hadde strevd med lenkene ei stund, så råna skøyta rundt i hamna og laga skikkelege bølgjer og skum, før redninga. Det var ein kald gjeng i badestampen etterpå. Artig å sjå. Håpar aldri eg kjem i ein slik situasjon at eg må ligge i lenke på havet og håpe på at det kjem ein båt...

Det vart ein vri på ettermiddagsritualet med badestamp, BANKETT og deretter bålkos. I kuling. For å få med seg alt dette held det sjølvsagt ikkje å lese ein blogg eller to, då må ein vere med på leiken. Det som skjer i stampen vert i stampen...

Crewet!
Ein herleg gjeng som brukar masse fritid på å lage eit supert padlearrangement!

Kvelden inne vart runda av med heder, ære og skryt i store porsonar. Trine Lise Olsen heldt tale så tårane spratt og lattermusklane rauk. Randi Skaug fortalde om Sakteruta.
Så ut til meir bål, gode samtalar og litt vemodig stemning: Er det slutt allereie?

Eg var litt for treig i avtrekket til å verte med på midtnattspadlinga, men tok den frå land i staden. Det vart ei skikkeleg Midnight Sun Experience ein av kveldane:

Somarnatt i nord

Sommarøya og Håja bak

00.15. Midtnattsol og Håja


 Kjekke folk, og flott natur. Eg har lyst oppatt for å få med meg fleire treff. Alle i Stormgjengen har jo skrytt av kvalpadlinga i vinter, så kanskje vi må satse på ei kvalpadlehelg? Det er verdt å "gå over bekken etter vatn" innimellom. Det einaste minuset med Troms er at det er litt for langt unna. Elles er det heilt på høgde med S&F og M&R.

Farvel, Sommarøya!
Vi er på ferja til Senja og snart klar for nye ferieeventyr....

Hekkingen

Dag 2 på Midnight Sun Experience. Offshoregruppa må handtere kuling. Klar melding på briefinga om morgonen.

Offshoregruppa på vatnet.

Flåte ved Edøya. Grei vind og god stemning. Klart vi kryssar til Hekkingen.

Nina i perlehumør.

Vi starta på kryssinga, og såg bygene komme. Vermeldinga hadde sagt mest vind etter byga, noko både Nina og eg stussa på. Vindkasta som kom i forkant var i alle fall kraftige nok, og brått var kosepadlinga blitt kulingpadling. Vi var i Malangsgapet, eit av dei berømte havstykka i Norge. Eg tok ikkje eit einaste bilde på overfarten. Hata litt. Hatar vind. Hadde grei kontroll på kajakken. Det vart bølgjer og vinden held seg stabilt sterkt. Gruppa spredte seg over eit stort område og gjorde det heile litt unødvendig spennande. Vi var litt usikre på kor på Hekkingen vi skulle. Beskjeden var sørenden, men mange i gruppa la kursen midt på. Eit par padlarar hoppa over på redningsskøyta, og det tok litt tid før heile crewet tok att gruppa. Dårleg av gruppa å ikkje få med seg det.   

Bjørn Tore og meg midt utpå Malangsgapet. Jepp, ser flatt og fint ut som alltid på bilde.  
Kristin er nybegynnar, men for ein stil og eleganse ho padla med i kulingen, flira, tok bilder og koste seg. (Foto: Kristin B Friis)

Fin landing på Hekkingen

Gunnar hadde med presenning og gadd å sette den opp sjølv om vi ikkje venta på han. For eit praktverk det vart! Regnet silte ned og vi var godt nøgde med å berre vere på Hekkingen. Det vart ein god prat om korleis vi hadde kryssa og kva som var lurt/mindre lurt å gjere som gruppe. (Foto: Nina/Kristin)

Regnet silte ned, så ingen grunn til å utsette middagsluren. (Foto: Nina/Kristin)

Beste kollektive middagsluren på lenge! (Foto: Nina)

Vind og regn gav seg, og vi heldt fram rundt øya. Imponerande sjømerke på toppen.

Hekkingen fyr

Disiplinert gjeng på tilbaketuren.

Veret roa seg, og siste kilometeren fekk eg prøve ving-åre. Artig og uvant. Det er nok ikkje noko å satse på for skuldra mi, men artig å prøve likevel. Så same prosedyra som dagen før: Badestamp, sjøbad, grilling og leirbål.


Kart frå Kristin: Turen vart ca 20 km
Tilbakemeldinga fra vervarslinga var at det var målt middelvind på 14 m/s i området då vi kryssa.

søndag 21. juli 2013

Håja - den høge øya

Første dag (4. juli) på Midnight Sun Experience (MSE) og vi vaknar til dette:
Sommarøya frå godsida!

Nina klar på vatnet.

Vi vart "dressert" på ASKR i 2011 og er på plass i god tid. Rett nok ikkje meir dressert enn at vi er på "Offshoregruppa".

Anita med stø kurs mot målet: Håja (486 moh).

Håja er ei klippeøy på yttersida (vest for Kvaløya).

På Håja var det fastbuande, fiskebruk og raudrevoppdrett i tidlegare tider. No er øya freda som landskapsvernområde, og kanskje mest kjent for å vere modell.

..og her er kopien. Ikkje dårleg til å vere ein kopi.
(Bilde frå dagen før i Tromsø - Ishavskatedralen)

Kjekt å padle med ein stor gjeng til ei forandring. Perfekte forhold og flatt hav.

Det vart reine intervjurunden utover. Kven er du, og kvar kjem de i frå? Det viste seg å vere ein aldeles herleg gjeng med forskjellege folk på turen.

Folk i flokk, lundefugl i flokk, flott landskap. Det var ikkje så lenge før vi runda Håja og la oss inn ei vik på austsida.

Lunsjidyll på Håja

Eg måtte ta eit grusomt val. Enten gå på toppen eller padle rundt øya. Elle melle. Det vart toppen. Hårfint.

Kristin og Nina på veg opp bakkane. Sommarøya bak.
  
Utsikt innover mot Kvaløya

TOPPEN!

Utsikta nordover. Der låg det og ei øy ute i havet og freista: Sørfugløya (heilt til venstre bak). Spørs om eg må nordover med kajakk att...

Det var ein veldig flott tur opp på Håja og utsikta var fantastisk. Andøya som ein skugge i sør, bak Senja sine blånande, kvasse tindar. Havet i vest (Grønland?) og Kvaløya i aust. Det hadde stilna heilt, og flatt hav vart havblikk då vi skulle heimover.

Fornøgd gjeng! Foto: Kristin B. Friis

Eg symjer for livet.....

Lundefugl på alle kantar. Dei er fantastisk fine!

Lang kryssing på ope hav gjekk veldig greit.

Nina og Anita mot Kvaløya

Eg speglar meg og..  Foto: Kristin B. Friis

Det vart ein kjempedag på sjøen med Offshoregruppa. Tilbake på Sommarøya vart det bading, badestamp og grilling.

NESTEN 10 grader i vatnet og kjempevarmt...

God stemning rundt leirbålet. Ferien er skikkeleg i gang. Nord-Norge-forelskelsen er på.
Midnight Sun Experience 2013 er allereie ein suksess.

Kart frå Kristin B Friis: 28 km padling, 3,5 km gåing med 486 høgdemeter kvar veg. 

tirsdag 9. juli 2013

Turist i Tromsø

3. juli. Etter 160 mil i bil var det godt med ein beinstrekk i Tromsø. Vi hadde eit par timar til gode før oppmøte på Sommarøya, og kva gjer ein då? Nina og eg hadde sett oss ut fjellheisen og utsikta frå Fjellstua. Vi hadde sjølvsagt alarmert kjentfolk om ankomsten. Geir var einig med oss i at Fjellstua var eit bra utsiktspunkt, men meinte vi måtte gå opp.

Så då gjekk gondolen i veret utan oss...

Søtaste turstimerkinga!

Tromsø har ca 20 turar i "Ti på topp"-fjelltrimmen sin.

Flott sti og snart var vi oppe i lia med fin utsikt.

Nina og Geir - Tromsø

Flotte fjell på Kvaløya bak byen. Bak der igjen...Sommarøya!
 
JUMP! Turistmodus og ferie - no er hoppesesonge i gong att!

Ein litt kjedeleg hump inne i dalen. Ops! Det er visst denne Tromsdalstind som alle snakkar om. Jadda, vi har sett den frå baksida, men frå denne vinkelen er vi ikkje imponert. Må nok få den med oss ein gong, men ikkje i dag.

Det gjorde vannvittig godt med ein tur etter dagar i bil. Turen vart sjølvsagt toppa med vaflar på Fjellstua (421 moh) og jogging rett ned til bilen (50 moh).

Så ein god kikk på Ishavskatedralen før vi susar vidare.
Oppdrag Tromsø vel utført i denne omgangen!