Siste sommarnatta på Synesholmen

31.08 Fredag - og siste sommarkvelden i 2018. Panikken for at sommaren faktisk snart var slutt greip oss. Alle dei fine kveldane må nyttast! Vi veit ikkje kor magne vi får utover. Havblikk og solnedgang, denne kvelden vart det i alle fall silkeførepadling! Heldigvis, sidan eg hadde gløymt spruttrekk.  Sjeldan eg gløymer slike ting. Det kjendes skikkeleg rart å padle utan trekk. Omlag som å køyre bil utan sikkerheitsbelte. Vi hadde med ved, fyrstikker og litt grillmat og let kveldsmørket senke seg før vi for heim att ved midtnatt. Månelyst og skimrande sjø. No kan hausten berre kome. Vi har nytta sommaren godt! Mørkepadling vert det nok meir av utover. 

Lovande frå start

...og blankare vart det...

Eg har stø kurs mot båling og Synesholmen (Foto: Roger)

 

Prøvepadling med surfski

17.07 og 28.08 Test av surfski på Giske. I juli fekk eg prøve Epiv V8 pro, og i august var det Kyrre sin Nelo (42 cm brei og 6,40 lang) som stod for tur. Artig å prøve, sjølv om det er ei utfordring med balansen og eg skjønnar ikkje heilt reentry-teknikken.

Foto: Kyrre

Krevande øving å sitte i ro, må ha fart på desse for å ha LITT stabilitet

Kyrra har fått opp farta i Neloen

Premieretur med Paul Gustav

26.08 Fleire av dei eg jobbar i lag med i Kystverket er nyfikne på padling. Denne kvelden vart Paul Gustav med på sin første kajakktur nokon sinne. Det gjekk veldig fint. Kombinasjonen stødig kar og blankstille er bra på premierepadling. Vi tok kort tørrtrening på redning på plena, la ut og for avgarde.  Eg må berre takke for tilliten! Ut i frå gliset vert det meir padling! Vi lova oss sjølve å øve på våt redning neste gong.   

ÅST-padling Giske rundt

23.08 Livet etter ferien skal sveivast i gang att! Kyrre og ÅST inviterte til Tur Giske rundt. Øystein, Torunn og eg starta i Skjonghavna. Med rykande ferskt våttkort rett frå grunnkurs var Torunn spent på turen. Ut i frå smilet trur eg ho vert med på fleire turar etterkvart! Eg testa Rebelen på turpadling for første gong. Hyggeleg selskap og god mix av folk. Giske rundt er alltid flott, sjølv når veret skiftar i grått. Selulf var og såvidt bortom oss for å helse på, men han var ikkje i det sosiale hjørnet denne dagen.

 

 

Raunen i horisonten

Frå snirkling til ope hav! 

Turen vart 13 km på meg. Vi runda av i Skjonghavna med rulling og redning. Finfin temperatur i sjøen! 

Surfesøndag med ny brottåre

19.08  Laurdag kom åra i posten: Stikine med tynt skaft og 1,90 lengde. No skal eg teste om kort åre er tingen i surf og brott. Hypotesa så langt er: kortare åre, større padleglede! Heldigvis tikka det inn melding om kvelden: Padling?

Nyåra!!!

Kolonne til Godøya. Då rekk ein å reflektere kor heldig ein er: Stort sett kan eg fare kor eg vil når eg vil, og eg har padlevennar som dreg meg ut på gråversdagar! 

Øystein i farta

Jason i farta! - rett frå ferie med masse energi!

Slik ser det altså ut frå land

Det var skikkeleg vanskeleg å fange surf denne dagen. Ein del vind og eit absolutt krav om presisjon for å vere i posisjon til surf var krevjande. Etter nokre timar var eg veldig sliten. Ny-åra bestod med glans, og eg gledar meg til å prøve den på strandsurf! Perfekt lengde og jammen var ho var rullbar på begge sider.

 

Kenneth demonstrerar perfekt timing!

Rosholmen

14.08 Sjølv om ferien er slutt, går det an å gjere kjekke aktivitetar om ettermiddagane. Eg hadde ønska meg ein gylden augustkveld. Ein slik der hav og himmel smeltar saman og sjøen legg seg paddeflat utover kvelden. Slik vart det IKKJE. Berre dei mest hardbarka camperane heldt framleis stand på Blimsanden. Det vart tørrdraktantrekk på oss. Sommaren er definitivt på hell.

Namnesøster Lene med "ny" tilsvarande lillesøsterkajakk. 

Desse skal nok få lufta seg i lag framover! 

Holmehopping frå Blimsanden

Ope hav, litt vind, fin temperatur. Det er kjekt å padle sjølv om det ikkje er blankstille og. 

Oter, havsule og ørn stakk innom tidleg på turen. 

Storholmen fyr langt der ute..

Kurs mot Rosholmen. Det var litt bølgjer og kjensle av skikkeleg HAVpadling. 

Ingen heime på Rosholmen i dag - så vi måtte nøye oss med eige SELskap. Det som ser ut som ein svart stein i havet er ei heil lita verd for seg sjølv når ein kjem ut hit. Fleire holmar med spennande steinformasjonar, klårt vatn og mange slag tang og tare. 

I skjergarden ved Rosholmen. Delfinsteinen. 

Titt-tei! 

Trøffeltang! 

Trøffeltang er visst ei skikkeleg delikatesse, som vi sjølvsagt måtte smake på. Mykje smak ja... Mogleg eg er litt urettferdig mot trøffeltanga no, men når hovudet eigentleg er innstilt på beinstrekk og sjokoladekjeks, så vart det litt harking og spytting.  

Framtidig kannestein

Lykta

Fyrturistane

Tøft landskap

Solnedgang med litt vind og bølgjer heim att - men ikkje meir enn at det var kjekk padling. 

Stort landskap - og dei siste solstrålane for dagen

Planlagt rute, det vart omlag slik og ca 12 km padling. 

Knallfin og frisk kveldstur!

Kajakktreff og uoffisielt NM i grønlandsrulling på Stokkøya 2018

8.-12.08 I kajakkmiljøet er "Stokkøya" synonymt med eit avslappa padletreff. Her er det nerding på alt som gjeld grønlandsrulling og tilhøyrande utstyr samt uhøgtideleg kappleik i båtbygging og rulling. Eg har tenkt på det lenge, men i år var første gongen eg fekk det til å delta, på treff nr 10 i rekka.

Førebuingane starta i vinter. Eg fekk tak i ein moderne variant av grønlandskajakk (Rebel Ilaga). Tuiliqen fekk eg testa heile to gonger veka før eg for oppover. Rullinga har eg hatt eit avslappa forhold til, inntil eg på generalprøva heime klarte tilsvarande 82 poeng. Då skaut sjølvsagt ambisjonane i veret.

Generalprøve i Skjonghamna med kajakk og tuiliq (Foto: Audun)

Antrekket er overraskande komfortabelt å rulle med. Dei viste nok kva dei gjorde, grønlenderane.  Vi har bytta ut selskinnet med neopren, men prinsippet er det same. 

Nytt land for meg. Trøndelagskysten er ikkje så verst, sjølv om han ligg noko avbakeleg til. 

Strandbar og padlecamp. Stokkøya i eit nøtteskal.  

General Bernt ønskjer velkommen! (Gjett kva flagg det er....)

Camp Nøklevann. 

Eg la meg inn på Oslofolket denne gongen.  Nøklevann ro- og padleklubb stilte mannsterkt med begge kjønn.  

Workshop dag 1 med Dubside. 

Det vart gjennomgåande mykje rulling og lite bilde. Eg slit framleis med vrangsida, framoverlente ruller og kan få tendensar til panikk i vatnet. Men du og du så mykje ein prøver og lærer på eit slikt treff! Etter dag ein var eg mørbanka i skrotten, etter dag to kunne eg nesten ikkje gå... 

Ulike grupper på sjøen

Slik gjekk no dagane. Ulike grupper kvar dag: Padleteknikk med grønlandsåre, nybegynnarrulling, lære vekk rulling, rulling på djupt vatn, synkronrulling og dronefilming. Eller eigen aktivitet om ein heller ville det. For ein kontrollfrik som meg var programmet i grenseland laust i snippen. Det var likevel akkurat nok organisering til at det heile gjekk smertefritt, og det såg ut til at dei fleste fekk gjere noko dei likte og hadde utbytte av. Dagane var fulle av aktivitet, nesten travelt til tider. Store glis over heile fjøla. Dette treffet fokuserar på tradisjon - noko som gjer at ting nesten garantert vert gjort likt som i fjor - og det er berre å spørje dei som har vore der fleire gonger. Alle deler erfaringar og historier.  

Fint ver og god vasstemperatur dei første to dagane gjorde sitt til at det var superkjekt å vere i vatnet. Eg målte 17 grader i sjøen på stranda. 

På Grønland driv dei og med tauøvingar. Øvingane skal trimme og herde gode padlarar. Dubside demonstrerte, og dei som ville fekk prøve. Kjempeartig og tungt - og tau står på ønskelista!  

Link til øvingane

Dubside demonstrerar "low rope" - øvingane

Foto: Anne

Kubb om kveldane

Hotellet

Fredagen var det dritver, kviledag og båtbyggarkonkuranse. Eg var ikkje så delaktig i bygginga, men det veldig artig å sjå på og. I løpet av nokre timar vart det designa og bygd kajakkar som etterpå vart testa i mangekampøvingar på stranda. Nokre trelister, tau, tape og plast var utgangspunktet. Resultatet vart tre lekre smekre svarte skjønnheiter. 

Ein viking går i land: Vidar

Kapp-padling

Rundt flagget og retur...

Spennande innspurt! 

Jørgen endar som vanleg opp slik....

Slim fit design...

Oppi skal han - her er det berre å kle på seg kajakken! 

Alle kajakkane vart og rulla etter alle kunstens reglar

Jannie fekk skikkeleg dreis på harpunen! (Harpun står og på ønskelista no..)

Natt til laurdag var det få i teltleiren som sov godt. Kuling og styrtregn. NM dagen var ruskete og våt, men ikkje verre enn at det vart konkurranse. 

Første pulje ut fekk ein tøff start! 

Dommarbua og publikumstribuna

Løpande rapportering heim frå Nøklevann ro- og padleklubb..

Anne ferdigrulla, og Jørgen skal i ilden....

Opptak rulling (best utan lyd, still kvalitet på høg..)

Link til Anne si rulling

Link til Jørgen si rulling

Publikum også UNDER kaia... #gutteklubbengrei

Anne (vinnar), Dubside (dommar) og Jørgen (vinnar) 

Topp tre herre

Topp tre dame

Link til resultat NM grønlandsrulle

Eigen innsats: Rota det litt til i konkurransen. Klarte ikkje å halde konsentrasjonen. Fekk 59 poeng og er ikkje nøgd med det, sidan eg hade klart fleire ruller rett i forkant. Men då er det berre å fare heim,  øve meir og ta turen neste år! I denne konkurransen trur eg at alle først og fremst kjempar med seg sjølv. 

Uansett så var det veldig kjekt å delta på treffet, med god miks av nokre gamle og masse nye kjente. Om du er bittelitt interessert i rulling så er det verdt å ta turen! 7.-11 august 2019 - ny sjanse!   

Strandbaren i solnedgang