Rulledagbok 2018

11.07 Surf og nødvendigrulle. Feid avgarde med skum to gonger. Måtte ut av kajakk første gong. (Hugs gje OK teikn og snu kajakk rett veg tvert.) Etterpå fekk eg baklengsurf på veg ut, kraftig bølge mykje skum, lite luft, men rulla opp. Veldig nøgd med den.  (I staden for ukontrollert sidesurf, prøve å gå for kontrollert rulling med ein gong neste gong. Fordel med stormrulle: Kjem opp med lavt støttetak. Øve på det neste gong.) 

10.07 Julirulla! Rull og tull på Giskesanden med Lene og Kyrre.  Sesongstart med grønnlandskajakk. Drog igjennom rullene som eg kan. Neste økt skal ha fokus på stormrulle på vrangsida og handrulling. (Ca 40 poeng)

17.06 Mallavika. Kjempeartig surf og mange nødvendige ruller som satt godt. Måtte ut av båten ein gong, det vart så veldig grunt etterkvart.

16.06 NPF Workshop på Runde. Rulla begge sider fleire gonger + mykje eigenredning. Må øve meir på reentry og rulle.

10. juni AWP - Junirulling i Rystraumen. Vrangrulla satt. Kaldt i sjøen.

Mairulle? Rulla på godsida, men er usikker på vrangsida. #gammelogglemsk #månoteretvert

22. april Alnes! Testrulle etter 20 meter inne i hamna. Ei "nødvendig rulle" på surf - etter å ha havna på baklengssurf og deretter dratt rundt av bølgja. Sjølv om eg landa i ei taresuppe og kom opp som "utkledd" som draugen så satt rulla som den skulle. Meistring!

15. april Kenneth lurte meg til ei rulle utan hette, berre med tynn treningstopp under tørrdrakta. Kaldt. Vil opp med hovudet med ein gong når det er kaldt. + ekkelt med vatn i øyra.

8. april Aprilrulling i boks Skodjestraumen. Begge sider. Herleg å vere attende i Nukaen!

2. april Aprilrulla på godsida på Erkna. Bomma på vrangsida. Skal rulle meir i april. Ikkje så kaldt i vatnet der ute.

28. mars Marsrulla i boks. Skikkeleg kaldt i vatnet, så vart minimum med ei på kvar side.

22. mars Bassengtrening. Scullinga gjekk betre. Fekk til fleire av dei framoverlente grønnlandsrullene på begge sider. Stormrulla på godsida satt som eit skot. Serierulling - vanleg på begge sider, og stormrulla på godsida. Har framleis lite lungekapasitet, så stoppar på tre. Bør øve inn med fire. Følg opp: Spine roll og reverse sweep.

15. mars Bassengtrening. Mengdetrening på vrangsida. Har mykje ugjort her og var veldig sliten. 

8. mars Bassengtrening. Akkurat oppe frå influensa og null lungekapasitet. Rulla mykje på godsida. Standard, kastetre og ei handrulle. Stormrulle shotgun og armkrok OK. Får ikkje til spine roll og bak nakken enda. Starta å gnage på chest brace og førebu reverse sweep. Alt i alt ein veldig bra dag med tanke på formen. Neste gong bør det vere berre vrangsida... 

28.02 Februarrulla gjekk til helvete. Skikkeleg influensa og ute av spel. Angra litt på at eg ikkje nytta høvet på tur den 25.02, men eg orka verkeleg ikkje.

15. februar Bassengtrening! Det gjekk mykje betre enn sist, og eg var langt meir komfortabel i vatnet no. Det lausna på stormrulla , men litt stor skilnad på sidene, så vrangsida må terpast. Standard rulle med kastetre satt på begge sider og eg fekk til fleire handruller på godsida. Chestscull var heilt ute av hukommelsen, det fekk eg ikkje til.

2. februar Bassengtrening! Veldig kjekt å vere i gang att. Vrangsida framleis vrang, og rusten, men fekk prøvd på litt av kvart. (Vanleg rulle, armpit, butterfly, stormrulle 1.0 og EI handrulle på godsida. Mengdetrening stnd rulle på vrangsida). Usikker på static brace og sculling - som vanleg.

22. januar. Påmeldt Qajaqakademi på Stokkøya august 2018.

13. januar Januarrulle i boks. Nydeleg laurdag mellom lågtrykka. Eg rusla ned i fjøra på Valderøya og rulla litt. Både rettsida og vrangsida satt, men eg finn ikkje att den gode trygge rullekjensla.



I 2018 er eg utfordra på månadsrulling av Marian - og den tek eg med å rulle på "vrangsida". Eg har og lyst til å få med meg rulletreffet på Stokkøya for første gong. Julegåva "Til Lene, frå Lene" vart grønnlandskajakk, så eg satsar på at 2018 skal verte eit godt nytt rulle år!

Ingen kommentarer:

Legg inn en kommentar