fredag 29. juni 2012

Gullpadling

Onsdag 27. juni  var det Kystverkspadling. Sygni vart mellombels "tilsett" i verket, og vi vart ein rein dametrio på tur. Sommarkveldane skal nytast medan dei er lange - så vi trekte ut mot havet med fyr i blikket.

Hamna ved Giske kyrkje - nesten Syden!

Vi padla nordover, rundt Giske og midt inn i verskillet.

Duett i molo. Den todelte moloen er kul.

Sjøfuglar i fleng, med ungar i alle variantar, strender, ku i solnedgang, eit lite verdsberømt musikkstudio og stram lukt på Kvalneset. Giske har mykje å by på frå sjøsida. Likevel så er det på Godøya det store trekkplasteret står...  

Med stø kurs mot Alnes

Alnes fyr i midtsommarskrud

Alnes fyr er kult. Det gjev ein ekstra dimensjon å komme hit sjøvegen. Vi landa på rullesteinane og vandra opp til fyret. Lukta frå enga slo i mot oss, og blomane konkurrerte om merksemda. SOMMAR! SOMMAR!
Oppe på fyret var det benkar og pledd. Vi toppa det heile med medbrakt varm drikke og skipskjeks (prøv å seie skipskjeks fort tre gonger på rad...!).

Meg, Trude og Sygni. Alnes fyr.  

Landing på Alnes

Det gjev eit hav av nye moglegheiter å utvide definisjonen på kva som er ein bra landingsplass. Vanlegvis så er det jo litt nedtur å padle siste biten heim. Denne kvelden hadde "ytre strok" planar om eit spektakulært show, som vi fekk vere ein del av på heimveg. Knallhard berekning eller rein flaks?

Erkna ønsker velkommen til gullpadling!

I eit strålande og flammande lys gjekk ferda tilbake til Giske. Trude padlar i venstre kant av bildet.

Eldkula samlar seg og går i havet. Takk for i kveld.

Det er slike kveldar som gjer at eg vil vere "heime" på Vestlandet om sommaren. Det er slike kveldar som gjer at sommaren vert fantastisk!

Turen vart ca 14 km

torsdag 21. juni 2012

Rullepoeng til Nukaen

Onsdag 20. juni. Teknikkøkt på Emblem med Sygni. Vi var skjønt einige om at no måtte vi slutte med denne hersens turpadlinga, og få oss ei skikkeleg treningsøkt. Det var på høg tid.

Tre lag med ull under tørrdrakta, og vi var klare! Herleg med sommar og lyse kveldar altså!

Sygni starta med å sette ei perfekt rulle etter bassengtreninga i vinter. Eg var nervøs, og hadde ikkje kontroll på ein flekk. Første forsøk på rulle i Nuken. Eg har jo tenkt på korleis eg må gjere det i sikkert fleire hundre timar i vinter, men hjelp det?

Romvesen klar for rulling!

Rulla satt! På første forsøk! For ei herleg kjensle når det berre fungerte gang på gang. Nuken er skikkeleg lettrulla og eg brukar ingen krefter på å få den rundt. Så då vart det rulling med både grønnlandsåre og euroåre. Kjempekjekt! Vi trente litt på eskimoredning og høge støttetak i tillegg - greit å ha kontroll på plan B.

No skal det rullast (i alle fall prøvast) på kvar ein tur framover. Det kan vel og vere greit å klare å rulle til begge sider etterkvart...  Eg ser at eg framleis gjer det litt feil, hovudet kjem opp litt for fort, og sveipinga er høgst variabel. Finpuss må til! Nukaen rullar likevel, og fekk masse ekstrapoeng i dag. Det er rett og slett ein skikkeleg artig kajakk altså!

Hovmod står for fall, og heilt på slutten så prøvde eg meg på butterfly-varianten. Det var nemleg den eg var nærast til å få til i fjor...

video
Filmsnutt: Oppsummering rulleøkt

Publikum kom akkurat då vi hadde pause. Ikkje mindre enn to cruiseskip dura forbi. 

 Stor variasjon i farkostane på fjorden

Sygni med nyåra - turåre frå Epic

Vi runda av kvelden med ein bitteliten runde for å teste ut den nye åra til Sygni. Ho let vel både over åra og servicen hos Alfa fritid. Vi fekk med oss måseungar, terner, tjeld, ærfugl med kull og hegre på turen, så det var ei flott avrunding på ei kjekk økt! Med tre lag ull var det greit med bading i ca 1,5 time. Under 10 grader både i sjøen og lufta.

mandag 18. juni 2012

Godøya rundt og "fyrplukking"

Søndag 17.juni. Eg var desperat etter tur, og heldigvis var det fleire som trengte å lufte kajakkane sine.

Tre blide og kjekke karar på søndagstur. Vi er i nærleiken av Vigra (vindfulle Vigra). Sjekk sjøen.

Flau vind (!) gav flatt hav. Det var litt grått og formen var "så der" på fleire av oss, så vi starta roleg frå stranda på Giske med mål om Alnes.  

Frå Kvalneset på Giske til Alnes

Fyret på Alnes er kult

Vi kom oss fort over til Alnes, men mista ein mann på vegen. Det var dagen for å padle mellom steinane ved stranda. Her brukar det vanlegvis å vere kvitt skum og ganske utriveleg. I dag var det skikkeleg artig teknikkøving.

Lunsj på fyret! Fyr nummer to for sesongen er erobra og dokumentert. Dei andre fyrane er for øvrig Jason og Hallgeir. 

Fyrmeistergraden i sikte! Sjølvsagt måtte vi opp og sjå, og vi fekk i tillegg med oss ei flott kunstutstilling på veg opp trappene (kake,vaflar og kaffi har dei og i kiosken). Note to self: Ta ALLTID med pengar på tur (og spesielt på Sunnmøre...)

Blomstereng på Alnes - mot Runde. Trur faktisk det var "Villblomstens dag" på søndag

Det var akkurat som vi kvikna til utover dagen, og det var liksom litt for kort tur å berre dra tilbake. Etter eit lite padleråd fann vi ut at kreftene burde halde til Godøya rundt. På vest og sørsida var det diverse artigheiter som måtte prøvast ut.  

Dagens heftigaste surf

Dagens mest elegante (og konsentrerte) rockhopping

Jettegryte - padlbar, men ikkje snubar

Ørn, av typen overlegen (vi drit i at de padlar rundt her)

Fyr nummer tre! Høgsteinen. Sukkertoppen frå ny vinkel.

Kule hus

Så skjer det som ofte skjer. Det er ikkje så mykje meir spennande å sjå og det er ca 5 km til bilen. Litt meir vind (motvind) og skvalping (sideveis). Så fekk vi trent litt i dag og. Vert alltid lang i armane siste kilometeren uansett kor lang turen er.   

Super tur, 22 km, to fyr med to fyrar og cirkumnavigasjon Giske - Godøya gjennomført for forste gong. Noko seier meg at det vert fleire rundar her!  


Vestlandssommaren - best med TØRRDRAKT!!

fredag 15. juni 2012

Runde!

Onsdag 13. juni. På fagdag/utflukt med jobben så var det lagt inn kveldstur til Lundeura på Runde. Det var ein frisk kveld, så antrekket var ull, vind, og vanntett. Ikkje ulikt det vi gjekk med i januar. Temperatur vart kompensert med humør.

På toppen av Lundeura!

Anbefalt gjennomføring av turen: 1. Finn Goksøyr på Runde og parker (lett). 2. Oppfør deg som turist, følg skilting (lett). 3. Første motbakken på bratt asfaltsti (litt andpusten her) 4. Resten på normal sti. Hald fram med å oppføre deg som turist. Hald deg på stien, sei muntert "Hei" til alle du møter, ha fotoapparatet lett tilgjengeleg. Snakk høgt om kor vakkert det er heile tida (lett).

KFA-karane på veg opp frå Goksøyr. Godøy og Sukkertoppen heilt bakerst til venstre

Då eg var lita hadde mamma lage ei bildebok til meg. Der hadde ho klipt ut fine bilde frå blad, limt dei inn i ei kladdebok og skreve namnet på tingen med blokkbokstavar under. Det bildet eg hugsar best var av ein lundefugl, så begrepet har vore i ordforrådet mitt sidan eg var ca 3 år. Eg har aldri sett dei på verkeleg nært hald før (Ein og anna svart prikk i det fjerne frå kajakk tel liksom ikkje).

Lunde!

Lunde!

Lundeura var heilt fantastisk. Dette er ei oppleving til å verte høg på! Flott natur og fuglar overalt. Svarte prikkar sverma i fjellveggen. Lunden kom inn frå sjøen, landa som ballar og flaug rundt øyra på oss. Utruleg artig! Storslått natur og eksotiske fuglar. Norges flottaste nebb? Eg håpar vi klarar å drive naturforvaltning slik at sjøfuglane overlever i framtida og (Link til miljøstatus - lundefugl- Norskehavet).

Fuglesverm utanfor Lundeura (ser ut som mygg, men vi er no trass alt sørafor her..). Nerlandsøya og Skorpa bakerst 

På rad og rekke sat dei der. På den eine sida av gjerdet; turistane, fuglekikkarane og fotografane. På andre sida lundefuglane. Sosiologisk nesten like fasinerande som fuglefjellet.

Do as the locals - det vil seie vagle seg i flokk i Lundeura om kvelden

På heimveg såg vi ut til Runde fyr. Det fungerar no som DNT-hytte, og her kan ein overnatte.

Runde fyr på tuppen av Kvalneset

Rundeturen var ei stor oppleving som det var kjekt å dele med gode kollegaer. Hit skal eg fleire gonger! Neste gong med fjellduk og speilreflekskamera.  

Turistskip i solnedgang. Man tager hvad man haver i mangel på elg.

Resten av kvelden tok vi innandørs med passande tilbehør inspirert av siste bilde.

Runde miljøsenter er det ei sjøfuglutstilling og dei viser film om samspelet i havet (populært kalla "Sildefilmen"). Vel verd å få med seg. Dei har og utstilling om Rundeskatten, som har ei veldig spennande historie! Stikkord: Global verdshandel på 1700-talet, dramatisk forlis og katastrofe med 200 tapte menneskeliv, unge dykkarjyplingar som snublar (dvs svømmer) over gullskatten i 1972. Senteret har gode konferanse- og møtefasilitetar, og kan stå for overnatting (i leilegheiter) og servering etter avtale.

tirsdag 12. juni 2012

Rockpool Alaw

Søndag 19. juni fekk eg møte Ann - venninna til Sygni. Ho hadde vore i Fosnavågen hos Tor Inge dagen før, og kom jammen med ein flett ny Nuka i tillegg til tørrdrakta som vi visste ho skulle ha. Når det regnar på presten... Dermed var det ein Rockpool Alaw til min disposisjon.

Når nokon kjem med raud Nuka, så treng vi ikkje mange minutta for å verte kjent. Grunnlaget er jo lagt i felles kvalitetsforståing for lenge sidan. Denne turan starta med inngåande analyse og kommentering av dei tre lekre kajakkane våre (vel ingen av dei er jo mine då.... faktisk):

Frå venstre: Romany, Alaw og Nuka

Kajakkane har eit relativt likt bruksområde. Skegkajakkar,som er lettmanøvrerbare og går fint i sjøen.  Kanskje ikkje av dei aller kjappaste. Alaw er eit nummer større i sittebrønnen.

Frå venstre: Nuka, Alaw, Romany. Frå denne vinkelen (bakfrå) var det størst skilnad

 Frå venstre: Nuka, Alaw, Romany

Premiere! Det ser ut som Nukaen er meir enn godkjent! (Lekker båt altså! Og flott dame sjølvsagt.)

Turen gjekk til Langevågsholmane og vi fekk både litt vind og blikkstille.

Bomonk?

Sygni sin kajakk vart omdøypt til "Bomonk". Både på grunn av speglinga, og fordi det var mistenkelig likt den lyden som vart produsert då ho bomma litt (eller ganske mykje) på eit styretak og køyrde kajakken for full guffe inn i ein berghammar. Den første skramma gjer mest ilt. NDK toler det.

Romany. Spegling er kult. Skjer nesten aldri.

Tilbake til samanlikninga:

Frå venstre: Nuka, Alaw, Romany. Romany er den einaste som er "flat" nok på sida til øvinga "frittståande sidelengs på plen".

Frå venstre: Alaw, Nuka, Romany. Alle båtane har ganske mykje "spring" (bananform) og er ganske flate under. Nuka har ikkje trekt tuppane så langt oppover på oversida, men har nesten like mykje bøy under. Ikkje la deg lure av det som er over vatnet.

Alaw er mykje romslegare enn Nuken i sittebrønnen. Formen på framdekk med mykje oppbygging rett framom cockpit gjer at eg måtte ha høgare åreføring enn vanleg, men det fall heilt naturleg. Kanskje til og med bra sidan eg har ein tendens til å legge meg på for låg åreføring.
Det var uvant å kunne ha knea oppunder haka (men kven har vel eigentleg bruk for det under padling?).
Cockpit er alt for stor for meg, slik at eg fekk litt dårleg kontakt med båten. På ein slik liten tur gjorde det ingenting. Fotbrettet i Alaw var genialt, og mykje betre enn pedalstøttene i Nuken, men dei er på den andre sida lettare å justere. Bevegelsesmønsteret til Alaw var veldig likt Nukaen. Skummelt likt. Lettsvingt og lettmanøvrerbar. Alaw var ein tanke meir retningsstabil utan skeg, og kjentes litt meir stabil ut (primærstabilitet). Med skegen ute gjekk den på skinner, men det gjer jo Nukaen og.

Cowboyentring: Litt uvant at baktuppen stikk så høgt! Bakdekket rett bak cockpit ligg omtrent like lågt i vatnet på Nuka og Alaw, men tuppen ligg ein "halvmeter" høgare på Alaw. Det kjentes i alle fall slik ut. Men når eg først fekk tenkt meg om så var det greit å gjere cowboyentring. Alaw ligg veldig stabilt i vatnet. 
Eg likar dekksrigginga betre på Nuken. På Alaw sluttar deksrigginga ein halv meter bak cockpit, medan på Nuka går den heilt fram. Plassering av strikkane framom cockpit fungerar og betre på Nukaen (det har sikkert litt med vane å gjere også).  

Fakta:
Nuka: lengde 5,03 m, bredde 52 cm
Alaw: lengde 5,21 m, bredde 53 cm
Romany: lengde 4,89 m, bredde 54 cm

Artig å treffe nye padlevennar og teste ny kajakk! Takk for lånet Ann!

Turen vart ca 10 km

mandag 11. juni 2012

Ellingsøyfjorden på langs

8.-9. juni hadde vi eit tidsvindauge til padling. Fredag ettermiddag var Sygni og eg på plass ved Vika feriesenter. Alt fekk plass i kajakkane og det var SOL!

Rimeleg fornøgde allereie FØR start.

Det var gjennomført nøye kalkulasjonar i høve flo/fjære og yr.no med tanke på vind på førehand. Det var EI kjent utfordring på turen: Dragsundet. Der ville vi få straumen i mot på eit relativ ugunstig tidspunkt. Ellingsøyfjorden rinn liksom ut i begge endar, og det er igrunn ganske rart. Elles var vi førebudde på ein fantastisk tur med vind i ryggen og medstraum heile vegen...

Dragsundet del 2. Med litt rå makt kom vi oss gjennom tidevasstraumen.

Ein liten strek i regninga var det at vinden snudde når vi snudde, så det vart motvind heile fredagen. Vi heva oss over det, og kosa oss utover fjorden. - Til å vere Ellingsøyfjorden er det no ganske fint, sa Sygni.

Blåne på blåne

Eit av høgdepunkta på turen er passering  av Straumsbrua. Eit av dei flottaste byggverka på Sunnmøre!
No var vi i alle fall komne så langt at vi hadde medstraum, noko som er ganske greit, då straumen kan vere ganske sterk her (Link til tidlegare straumpadling her).

Store gamle Straumsbrua.

Pause på Vemøya. Det viste seg at Sygni hadde fått plass til jordbær i Romanyen! Kjekk overrasking.

Ellingsøyfjorden er grunn, skvalpete på alle vindretningar og full av straum. Det er bilvegar (og tilhøyrande trafikkstøy), byggefelt og industri på alle kantar. Så eigentleg er eg litt negativ til heile fjorden. På den andre sida er det ganske idyllisk her dersom ein fokuserar på dei rette tinga.

Strandnellik i solnedgang

Nuka i kveldssol

Padlar med Sunnmørsalpekveld-bakgrunn

Det som er fint med å telte er at det gjev moglegheiter for å vere oppe og ute seinare og/eller tidlegare enn vanleg. Det som er eit lite tankekors med å oppleve solnedgangen på sjøen er at då må teltplassen lokaliserast i skyminga. Teltplassar veks som kjent ikkje på tre i Sør-Norge, og særleg ikkje når vi er litt kresne. Dyrøya var målet, og der såg vi ei fin grasslette. Men det var og ein haug med båtar og folk der... Ettersom det var lite aktuelt å padle vidare, så senka vi krava til villmark, og godsnakka oss inn med speidarane og ungdomsskuleklassen som allereie hadde invadert øya. Det vil seie at alle leiarene trudde at vi var leiarar på den andre gruppa...

Morgonstund og teltlivet er HERLEG!

Våningshuset på Dyrøy.

Speidarleiren

Det er faktisk speidarane som eig øya, og det er mykje leiraktivitet her. Dei delte gjerne på goder som utedo og vatn.

Kanskje litt trøtte i trynet, men vi er klar for dag 2!

Fru Aarseth i Årsetvika med godguten "Romany".

Dag to starta med medstraum, medvind og det var (for) varmt og deileg. Heilt grei start på dagen. (Det vart jo motvind og motstraum og meir normale forhold etterkvart då..)

Ellingsøyfjorden ved Langøya

Sidan vi begge hadde program for resten av helga, måtte vi på ein måte berre padle heim. Det vart diskutert mytteri og avbestilling av bursdagsfeingar m.m, men vi tok til vit og padla kortaste veg om Nørvesundet heim att.

Under innfartsvegen til Ålebyen. Det har då sin sjarm?

Turen vart totalt 33,5 km.

Takk for turen, Sygni!